People-მა 2026 წლის „მსოფლიოს ყველაზე ლამაზი ქალი“ დაასახელა – ეს ტიტული წელს ენ ჰეთევეის გადაეცა. 43 წლის მსახიობი გამოცემის სპეციალური ნომრის გარეკანზე გამოჩნდა და საკუთარ გარეგნობასთან, ასაკთან, კარიერასა და ცხოვრების ახალ ეტაპთან დაკავშირებულ გამოცდილებაზე გულწრფელად ისაუბრა.
მისი თქმით, კარიერის დასაწყისში საკუთარი თავის მიმართ ძალიან მკაცრი იყო, ახლა კი ამ მიდგომას აღარ იზიარებს. ასაკმა მსახიობი უფრო მშვიდი და თავდაჯერებული გახადა.
„40 წლის შემდეგ სხვა სიჩქარეზე გადავერთე“, – ამბობს ენი და განმარტავს, რომ ახლა მხოლოდ ის სურს, ცხოვრებისგან მაქსიმალური სიამოვნება მიიღოს.
ჰეთევეისთვის სილამაზე მხოლოდ გარეგნობას არ გულისხმობს – წლების განმავლობაში ამ ცნების მიმართ დამოკიდებულება შეეცვალა. დღეს მისთვის გაცილებით მნიშვნელოვანი ბუნებრიობა და თავდაჯერებულობაა.
ეს დამოკიდებულება მის სტილზეც აისახა. ჰეთევეი, რომელიც ორ ვაჟს ზრდის, ამბობს, რომ დედობამ ყოველდღიურ ცხოვრებასთან ერთად მის ჩაცმის სტილზეც იმოქმედა. ახლა მისთვის მნიშვნელოვანია, რომ სამოსი არა მხოლოდ ლამაზი, არამედ კომფორტულიც იყოს.
მსახიობი ასაკზეც თავისუფლად საუბრობს და ამბობს, რომ წლების მატება არ აშინებს.
„ასაკის მატება არ მაშინებს. გაცილებით უფრო მეტად მაშინებს ცუდი განათება“.
People-ის ახალ ნომერში კარიერის ამჟამინდელ ეტაპზეც საუბრობს. მისთვის განსაკუთრებით მნიშვნელოვანი „ეშმაკი ატარებს პრადას 2“-ში ენდი საქსის როლით დაბრუნებაა. პირველი ფილმის გამოსვლიდან 20 წლის შემდეგ ჰეთევეი კვლავ იმ პერსონაჟს განასახიერებს, რომელმაც მისი კარიერის ერთ-ერთი ყველაზე დასამახსოვრებელი როლი შექმნა.
ენ ჰეთევეის კარიერა ათწლეულებს ითვლის. მაყურებელმა ის „პრინცესას დღიურებიდან“ გაიცნო, შემდეგ კი „ეშმაკი ატარებს პრადას“, „ბნელი რაინდის“, „ინტერსტელარისა“ და „საბრალონის“ მეშვეობით კიდევ უფრო პოპულარული გახდა.
იგი People-ის ყოველწლიური „World’s Most Beautiful“ ნომრის 36-ე ვარსკვლავია. წლების განმავლობაში ამ ტიტულს ისეთი ცნობილი ქალები ატარებდნენ, როგორებიც არიან ჯულია რობერტსი, ჯენიფერ ენისტონი, ჯენიფერ ლოპესი და დემი მური.
ასევე დაგაინტერესებთ:
#OK! ორი განსხვავებული როლი, ერთი სტილი – ენ ჰეთევეის „Naked Dress“ ეპოქა წითელ ხალიჩაზე
