Prada Group-მა Versace-ს 1.36 მილიარდ დოლარად შეძენა ოფიციალურად დაასრულა. Reuters -ის ცნობით, ბრენდების გაერთიანება ჯანი ვერსაჩეს დაბადების დღეს დაემთხვა.
Versace-ს მენეჯმენტს, სავარაუდოდ, Prada-ს აღმასრულებელი დირექტორი და მიუჩა პრადას ვაჟი, ლორენცო ბერტელი უხელმძღვანელებს. ბერტელიმ განაცხადა, რომ Versace-ს შეძენა ბრენდს საშუალებას მისცემს ავთენტური სტილის საშუალებით ახალი აუდიტორია მოიცვას.
ახალმა აღმასრულებელმა დირექტორმა აღნიშნა, რომ Prada გარიგებით რამდენიმე წლის განმავლობაში იყო დაინტერესებული და მოდის სახლის უზარმაზარ პოტენციალში დარწმუნებულია. 2024 წლის პირველ ნახევარში Prada Group-ის შემოსავალი 8%-ით გაიზარდა და 2.74 მილიარდ ევროს მიაღწია.
„კონტაქტები COVID პანდემიის დროს უკვე მიმდინარეობდა. როდესაც გარიგება ანტიმონოპოლიური კანონმდებლობის გამო ჩაიშალა, ჩვენ დავბრუნდით და პროცესის დაჩქარება ვცადეთ“, – განუცხადა ბერტელიმ Reuters-ს.
შეგახსენებთ, რომ მარტში, დონატელა ვერსაჩემ Versace-ს კრეატიული დირექტორის თანამდებობა დატოვა. ის იტალიურ მოდის სახლს თითქმის სამი ათწლეულის განმავლობაში ხელმძღვანელობდა. ამავდროულად, ცნობილი გახდა, რომ მის თანამდებობას დარიო ვიტალე დაიკავებდა, რომელიც ადრე Miu Miu-ს ბრენდის დიზაინის დირექტორი იყო.
იტალიური კომპანია Prada 1913 წელს მარიო პრადამ და მისმა ძმამ, მარტინომ დააარსეს. თავდაპირველად, ისინი ტყავის ნაწარმის – ჩემოდნების, ჩანთების და ა.შ. იმპორტს ახორციელებდნენ, მოგვიანებით კი საკუთარი წარმოება დაიწყეს. ბრენდის განვითარებაში დამფუძნებლის შვილიშვილმა, დიზაინერმა მიუჩა პრადამ (ბრენდი Miu Miu მის საპატივცემულოდ შეიქმნა) მნიშვნელოვანი როლი ითამაშა. მიუჩა პრადა მრავალი წლის განმავლობაში ბრენდის მთავარი დიზაინერი იყო და კომპანიას მეუღლესთან, პატრიციო ბერტელისთან ერთად ხელმძღვანელობდა.
Versace-ს ბრენდი 1978 წელს დიზაინერმა ჯანი ვერსაჩემ დააარსა. კომპანია სუნამოებს, საათებს, აქსესუარებს და ფუფუნების სხვა საქონელს აწარმოებს. 1997 წელს ჯანი ვერსაჩე შეერთებულ შტატებში, მაიამიში მდებარე სახლის კართან სერიულმა მკვლელმა ენდრიუ კუნანანმა მოკლა. დიზაინერის გარდაცვალების შემდეგ, კომპანიის მართვა მის დას, დონატელას გადაეცა. 2018 წელს მან ბიზნესი ამერიკელ Michael Kors-ს 2 მილიარდ დოლარად მიჰყიდა, ამავდროულად Versace-ს მთავარ დიზაინერად მუშაობას აგრძელებდა.
ასევე დაგაინტერესებთ
#OK! დიდი ეპოქის დასასრული – დონატელამ VERSACE-ს შემოქმედებითი ხელმძღვანელის პოზიცია დატოვა
