ქართველმა მუსიკოსმა შოთა ადამაშვილმა ტეხასის ქანთრი მუსიკის საერთაშორისო კონკურსზე მნიშვნელოვანი ჯილდო მოიპოვა – Texas Sounds International Country Music Awards Festival-ზე ის 2026 წლის „საუკეთესო შესრულების“ გამარჯვებული გახდა.
„წელს გამიმართლა და წლის საუკეთესო შესრულების ჯილდო მოვიპოვე. გულითად მადლობას გიხდით“, – წერს მუსიკოსი სოციალურ ქსელში.
შოთა ადამაშვილის კარიერა საქართველოში, ბოლნისში დაიწყო. ბავშვობაში ფორტეპიანოზეც უკრავდა, თუმცა მუსიკასთან მისი პროფესიული კავშირი მოგვიანებით, სტუდენტობის პერიოდში, გიტარით გაგრძელდა.
ქანთრი მუსიკით ჯერ კიდევ ახალგაზრდობაში დაინტერესდა. როგორც თავად ჰყვება, მის ცხოვრებაზე დიდი გავლენა მოახდინა 1979 წლის ფილმმა „The Electric Horseman“ და მის საუნდტრეკში შემავალმა სიმღერამ „My Heroes Have Always Been Cowboys“.
მუსიკალური კარიერის დასაწყისში შოთა თბილისის ქუჩებსა და მიწისქვეშა გადასასვლელებში უკრავდა. მოგვიანებით მისი შესრულებები უფრო ფართო აუდიტორიისთვის გახდა ცნობილი. 2013 წელს ის „The Voice of Georgia“-ში გამოჩნდა, რასაც სხვადასხვა სატელევიზიო პროექტსა და საერთაშორისო ფესტივალზე გამოსვლები მოჰყვა.
შოთა საკუთარ მუსიკას ქანთრისა და ბლუზის გავლენებით ქმნის დაამერიკულ მუსიკალურ ტრადიციას ქართულ იდენტობასთან აერთიანებს. თავად აღნიშნავს, მიუხედავად იმისა, რომ ქანთრის მუსიკა ამერიკასთან ასოცირდება, მისთვის ეს პირველ რიგში განცდაა და არა კონკრეტული ადგილი.
საერთაშორისო სცენაზე შოთას კარიერა ბოლო წლებში განსაკუთრებით გააქტიურდა. 2022 წელს ის საცხოვრებლად ლატვიაში გადავიდა და ბალტიისპირეთის ქვეყნებში, ასევე პოლონეთში, გერმანიაში, ავსტრიაში, შვედეთსა და ფინეთში კონცერტები გამართა და რამდენიმე ფესტივალშიც მიიღო მონაწილეობა.
2025 წელს კი მუსიკოსმა პირველად იმოგზაურა აშშ-ში და Texas Sounds International Country Music Awards-ზე ორი ჯილდო მოიპოვა.
დღეს შოთა ადამაშვილი აქტიურად აგრძელებს მუსიკალურ კარიერას. მისი ახალი ნამუშევრები საერთაშორისო მუსიკალურ პლატფორმებზეც არის ხელმისაწვდომი – 2026 წელს კი სინგლები „My Name Doesn’t Ring A Bell“ და „Cowboy in Berlin“ გამოუშვა.
ასევე დაგაინტერესებთ:
#OK! პატარა ქართველი გოგონა, რომლის ვიდეომაც სელინ დიონი ააცეკვა – ვინ არის ევა ბუთიაშვილი?
