რამდენიმე დღის წინ სელინ დიონმა სოციალურ ქსელში ვიდეოკოლაჟი გამოაქვეყნა, რომელშიც პატარა ქართველი გოგონას, ევა ბუთიაშვილის, კადრებიც მოხვდა. ვიდეოში მსოფლიო ვარსკვლავი ევას ცნობილ ჩანაწერს უყურებს და მის მოძრაობებს იმეორებს.
ევა ბუთიაშვილი ყვარლის მუნიციპალიტეტის სოფელ გავაზში ცხოვრობს. პატარა გოგონა სოციალურ ქსელებში უკვე დიდი ხანია, მაყურებლის ყურადღებას თავისი უშუალობით, ემოციებითა და არტისტულობით იქცევს.
განსაკუთრებული პოპულარობა იმ ვიდეომ მოუტანა, რომელშიც ბაბუასთან ერთად ცეკვავს. ჩანაწერმა სოციალურ ქსელებში მილიონობით ნახვა დააგროვა, ხოლო მისმა ბუნებრივმა ემოციებმა უცხოელი მაყურებლის ყურადღებაც მიიპყრო. სხვადასხვა გამოცემის ცნობით, ვიდეოს ნახვების რაოდენობამ 75 მილიონს გადააჭარბა.
აღსანიშნავია, სელინ დიონი ერთადერთი ცნობილი ადამიანი არ არის, რომელმაც პატარა ქართველი გოგონას კადრები გააზიარა. მანამდე ევას ვიდეო თურქმა მსახიობმა დემეთ ოზდემირმაც გამოაქვეყნა.
„ვფიცავ, მაგრამ ვერ ვამტკიცებ“, – დაწერა მსახიობმა ვიდეოზე.
ევა ბუთიაშვილი და მისი უფროსი და, ანამარია, სოციალურ ქსელებში დედის, ფიქრიას მიერ გადაღებული ვიდეოებით გახდნენ ცნობილი. თავდაპირველად ფიქრია ოჯახურ კადრებს უფროსი ქალიშვილის, ანამარიას, მუსიკალური გაკვეთილებიდან აქვეყნებდა. მოგვიანებით კი ვიდეოებში პატარა ევაც გამოჩნდა და სწორედ მაშინ მიიქცია მაყურებლის განსაკუთრებული ყურადღება.
დღეს კი მათი ოჯახური კადრები უკვე საქართველოს ფარგლებსაც გასცდა და გოგონას ვიდეოებს უცხოელი მაყურებელიც აქტიურად ეცნობა.
ასევე დაგაინტერესებთ:
„საკუთარ თავს დავპირდი, რომ არ ვიტირებდი“ – სელინ დიონი ექვსი წლის შემდეგ სცენას დაუბრუნდა
#OK! სელინ დიონი სცენას უბრუნდება – ექვსწლიანი პაუზის შემდეგ მომღერალი პარიზში 16 კონცერტს გამართავს
