6-წლიანი პაუზის შემდეგ სელინ დიონი სცენას უბრუნდება. 58 წლის კანადელი ვარსკვლავი პარიზში ჩავიდა. მომღერალი ქალაქში 28 აგვისტოს გამოჩნდა და სასტუმროსთან შეკრებილ გულშემატკივრებს მიესალმა – ეს მისი წლის პირველი საჯარო გამოჩენაა.
დიონი პარიზში ხუთკვირიანი საკონცერტო სერიისთვის იმყოფება. პირველი კონცერტი 12 სექტემბერს, პარიზის La Défense Arena-ში გაიმართება, ხოლო 17 ოქტომბრამდე მომღერალი ჯამში 16 კონცერტს გამართავს. თითოეულ შოუს 30 ათასზე მეტი მაყურებელი დაესწრება.
მაღალი მოთხოვნიდან გამომდინარე, დიონისთვის 2027 წლის მაისშიც დამატებითი კონცერტები დაიგეგმა.
მომღერალს სცენაზე დაბრუნება ჯანმრთელობის მძიმე პერიოდის შემდეგ უწევს. 2022 წელს მას იშვიათი ნევროლოგიური დაავადება – ხისტი ადამიანის სინდრომი (Stiff Person Syndrome) დაუდგინდა. დაავადება კუნთების ძლიერ დაჭიმულობასა და სპაზმებს იწვევს, რაც დიონისთვის სიმღერაც კი მნიშვნელოვნად ართულებს.
ჯანმრთელობის გამო მომღერალს „Courage World Tour“-ის გაგრძელების გაუქმება და სცენისგან ხანგრძლივი პაუზის აღება მოუწია. ამ წლების განმავლობაში მკურნალობასა და რეაბილიტაციას გადიოდა და სცენაზე დასაბრუნებლად ინტენსიურად ემზადებოდა.
პარიზს დიონის კარიერაში განსაკუთრებული ადგილი უჭირავს. მომღერალს საფრანგეთთან ხანგრძლივი შემოქმედებითი კავშირი აქვს – მისი 27 სტუდიური ალბომიდან 15 ფრანგულენოვანია. თავად დიონმა პარიზს საკუთარი „მეორე სახლი“ უწოდა.
სცენაზე დაბრუნების წინ მომღერალი ემოციებს არც მალავს. პარიზში ჩასვლისას მან გულშემატკივრებს მადლობა გადაუხადა და აღნიშნა, რომ მათი მხარდაჭერა მისთვის ყოველთვის განსაკუთრებული იყო.
ასევე დაგაინტერესებთ:
#OK! “სტილის დედოფალი” 55 წლის გახდა – ლეგენდარული სელინ დიონი იუბილარია
