ჯეიმს ბონდის როლის შემსრულებლის შესარჩევი პროცესი გადამწყვეტ ეტაპზე გადავიდა. როგორც Deadline წერს, Amazon MGM Studios-მა საბოლოო ეკრანული ტესტის გასავლელად სულ მცირე ოთხი მსახიობი შეარჩია. გამოცემა მათგან სამის ვინაობას ასახელებს: ჯეკ ლოუდენს, კალუმ ტერნერსა და ჯოშ ო’კონორს. მეოთხე კანდიდატის ვინაობა ჯერჯერობით უცნობია.
ჯეკ ლოუდენი
შოტლანდიელი მსახიობი მაყურებელმა სერიალ „Slow Horses“-ით გაიცნო, სადაც ის რივერ კარტრაიტის როლს ასრულებს. ლოუდენი ასევე მონაწილეობდა კრისტოფერ ნოლანის ფილმში „Dunkirk“, ისტორიულ დრამაში „Mary Queen of Scots“ და ბიოგრაფიულ ფილმში „Benediction“, სადაც პოეტ ზიგფრიდ სასუნის როლი შეასრულა. მისი ერთ-ერთი მნიშვნელოვანი სატელევიზიო ნამუშევარია სერიალი „The Gold“.
კალუმ ტერნერი
ბრიტანელი მსახიობი კალუმ ტერნერი ფართო აუდიტორიამ „Fantastic Beasts“-ის ფილმებიდან გაიცნო, სადაც თეზეუს სკამანდერის როლს ასრულებს. მის ცნობილ ნამუშევრებს შორისაა ჯორჯ კლუნის რეჟისორობით გადაღებული ფილმი „The Boys in the Boat“ და ჯეინ ოსტინის რომანის ეკრანიზაცია „Emma“.
ჯოშ ო’კონორი
ჯოშ ო’კონორის სახელი განსაკუთრებით ცნობილია სერიალ „The Crown“-ის მაყურებლისთვის. მსახიობმა პროექტში პრინცი ჩარლზის როლი შეასრულა და „ემისა“ და „ოქროს გლობუსის“ ჯილდოებიც დაიმსახურა.
ასევე მონაწილეობდა ფილმებში „God’s Own Country“, „Emma“ და „Challengers“, სადაც ზენდაიასა და მაიკ ფაისტს უწევდა პარტნიორობას. მის ბოლო ნამუშევრებს შორისაა „Wake Up Dead Man: A Knives Out Mystery“.
ჯეიმს ბონდის ფილმს რეჟისორი დენის ვილნევი გადაიღებს, სცენარზე კი „Peaky Blinders“-ის შემქმნელი სტივენ ნაითი მუშაობს. ჯერჯერობით უცნობია, ვინ მიიღებს 007-ის როლს და როდის გამოცხადდება საბოლოო გადაწყვეტილება. ახალი ფილმის პრემიერა, გავრცელებული ინფორმაციით, 2028 წელს იგეგმება.
ასევე დაგაინტერესებთ:
#OK! ყველა დროის საუკეთესო ჯეიმს ბონდი – ლეგენდარული შონ კონერი
