ბარნაბა ფორნასეტი იტალიელი სკულპტორი და კონცეპტუალისტია, რომლის ისტორიაც მამამისისგან – პიერო ფორნასეტისგან იწყება და დღესაც გრძელდება.
1950 წელს პიერო ფორნასეტის შემოქმედების საინტერესო ეტაპზე დაიბადა მისი ერთადერთი ვაჟი, რომელიც წარმატებით გაჰყვა მამის კვალს. ის მცირე ასაკიდან აქტიურად იყო ჩართული მამის შემოქმედებაში, იზრდებოდა გარემოში, სადაც მიმდინარეობდა მუდმივი შემოქმედებითი წვა და ამიტომ გასაკვირი არ არის, რომ დღეს ის „პრაქტიკული ხელოვნების ჯადოქარია“.
ინსპირაციის უდიდესი წყარო მამამისი – პიერო ფორნასეტია და შთაგონებაც ხშირ შემთხვევაში სწორედ მისი შემოქმედებიდან მოდის. ზოგჯერ შესაძლოა ეს იყოს დასვენებაც, რადგან მიაჩნია, რომ გენიალური იდეები სწორედ ასეთ დროს იბადება. მაგალითად, აუზში, ან ზოგადად დასვენებისას, განტვირთვისას, რაც ადამიანს ძალიან უყვარს.
პიერო ფორნასეტი ყოველთვის გამოირჩეოდა ხელოვნებისადმი საინტერესო მიდგომებითა და ინოვაციებით, ამიტომ, ბუნებრივია, ამჟამად მისი შემოქმედებისთვის თვალის შევლება მისსავე შოურუმშია შესაძლებელი. შოურუმი მილანში მდებარეობს. მისი მთავარი განმასხვავებელი ნიშანი ისაა, რომ შეძლო ადგილის დაზოგვა, შექმნა ხელოვნების მინიატიურული ნიმუშები, რომლებმაც შემდეგ დღის სინათლე იხილა.
მიუხედავად იმისა, რომ შოურუმში წარმოდგენილი თითოეული ქმნილება მინიატიურულია, სწორედ ისეთივე ტექნიკითაა შექმნილი, როგორც ორიგინალი ზომების შემთხვევაში. „ფორნასეტის სახლი“ ერთდროულად არის გასაოცარი რეალობაც და სიურრეალიზმიც.
ვიზუალურმა და ემოციურმა ასპექტმა, რომელთან შეხებაც ბარნაბას ჰქონდა, უდიდესი კვალი დატოვა მის ცნობიერებაში.
მართლაც, ფორნასეტის სახლი განსაკუთრებული მიკროსამყაროა – აქ ყველაფერი ხელით არის შექმნილი. ავეჯის უმრავლესობა ბარნაბა ფორნასეტის მიერ, პიერო ფორნასეტის შექმნილი ორიგინალი ნიმუშების გადათამაშებაა. მნიშვნელოვანია ნებისმიერი დეტალი და დიდი ყურადღება ეთმობა მათ შექმნასაც. პიერო ფორნასეტის არქივი 11 000-მდე ნამუშევარს მოიცავს, შესაბამისად, უდიდესი პასუხისმგებლობით ხდება მათ შორის ახლად გამოსაცემის შერჩევა და შემდეგ შეზღუდული რაოდენობით შექმნა. მათი უმრავლესობა უნიკალური დიზაინის მატარებელია.
ფორნასეტის სახლს უდიდესი ისტორია აქვს. იგი მეცხრამეტე საუკუნეში აშენდა პიერო ფორნასეტის მშობლების მიერ. სახლის წყობამ, ფერთა გამამ, განლაგებამ გასაოცარი გავლენა მოახდინა ფორნასეტის ხაზის ჩამოყალიბებაში. პიერო ფორნასეტის ცხოვრებამ სახლი წლების განმავლობაში ნამდვილ ხელოვნების ნიმუშად აქცია. შეიძლება ითქვას, რომ ამ კონკრეტულმა გარემომ თავად შექმნა ჯერ პიერო, ხოლო შემდეგ ბარნაბა ფორნასეტი.
ამჟამად, ბარნაბა ფორნასეტის ნამდვილად თავბრუდამხვევი ცხოვრება აქვს − ქმნილებიდან ქმნილებამდე, შემოქმედებითი წვიდან შემოქმედებით წვამდე, გამოფენიდან გამოფენამდე. ბარნაბა ფორნასეტის მუდმივად აქტუალურობის დასამტკიცებლად, საკმარისია თვალი გადავავლოთ მის უკანასკნელ აქტივობებსა და მიღწევებს.
