ლეგენდარული ბრიტანელი მუსიკოსი პოლ მაკარტნი მსოფლიოს უმდიდრეს მუსიკოსებს შორის მესამე ადგილზეა. ჟურნალ Forbes-ის შეფასებით, 84 წლის არტისტის ქონება 1.4 მილიარდ დოლარს შეადგენს. ამ მაჩვენებლით ის მილიარდერთა კლუბს შეუერთდა და რეიტინგში მხოლოდ ჯეი-ზისა და ტეილორ სვიფტს ჩამორჩება.
Forbes-ის ინფორმაციით, მაკარტნის ქონება ექვსი ათწლეულის განმავლობაში დაგროვილი მუსიკალური ჰონორარების, საავტორო უფლებების, საკონცერტო საქმიანობისა და სხვადასხვა ინვესტიციის შედეგია.
მუსიკოსმა საკუთარი მუსიკალური გამომცემლობა MPL Communications 1969 წელს დააარსა და სოლო კარიერის ფარგლებში შექმნილ მუსიკაზე საავტორო უფლებებისა და ჩანაწერების კონტროლის შესაძლებლობა მიიღო. მოგვიანებით კი სხვა არტისტების ნაწარმოებების საავტორო უფლებების შეძენაც დაიწყო.
მისი ქონების მნიშვნელოვანი ნაწილი The Beatles-ის მუსიკალურ მემკვიდრეობასაც უკავშირდება. წლების განმავლობაში მაკარტნი და ჯგუფის სხვა წევრები ცდილობდნენ, საკუთარი შემოქმედებიდან მიღებულ შემოსავალზე მეტი კონტროლი მოეპოვებინათ. დღეს ჯგუფის ჰოლდინგური კომპანია Apple Corps მუსიკის სტრიმინგიდან, ვინილის ჩანაწერებისა და ბრენდირებული პროდუქციის გაყიდვებიდან ყოველწლიურად 50 მილიონ დოლარზე მეტ შემოსავალს იღებს. ამ თანხას მაკარტნი, რინგო სტარი და ჯონ ლენონისა და ჯორჯ ჰარისონის მემკვიდრეები თანაბრად იყოფენ.
მაკარტნის ქონებაში ასევე შედის საკონცერტო ტურნეებით გამომუშავებული ასობით მილიონი დოლარი, უძრავი ქონება დიდ ბრიტანეთსა და აშშ-ში, მათ შორის ჰემპტონსში, ასევე ხელოვნების ნიმუშების კოლექცია, რომელშიც პაბლო პიკასოსა და რენე მაგრიტის ნამუშევრებია წარმოდგენილი.
ასევე დაგაინტერესებთ:
#OK! ჯონ ლენონი 86 წლის გახდებოდა – საინტერესო ფაქტები ლეგენდარული მუსიკოსის ცხოვრებიდან
