9 ოქტომბერი ლეგენდარული ბრიტანელი მუსიკოსის, ჯონ ლენონის დაბადების დღეა – ლენონის ცხოვრება მხოლოდ მსოფლიო ჰიტებითა და თაყვანისმცემლებით არ შემოიფარგლება – იყო რთული ბავშვობა, სიყვარული, ოჯახური დრამები, ხმაურიანი განცხადებები და პოლიტიკური აქტივიზმი.
OK! Magazine გთავაზობთ საინტერესო ფაქტებს მუსიკოსის ცხოვრებიდან, რომლებიც მის პიროვნებასა და შემოქმედებას ახლებურად დაგანახებთ.
მუსიკა დედამ შეაყვარა
ჯონ ლენონის ბავშვობა მარტივი არ ყოფილა. მამა, ალფრედ ლენონი, შვილს იშვიათად ნახულობდა, მოგვიანებით კი მის აღზრდაში მონაწილეობა თითქმის შეწყვიტა. მუსიკოსი ძირითადად დეიდასთან, მიმი სმითთან იზრდებოდა, თუმცა დედასთან, ჯულია ლენონთან, ახლო ურთიერთობას ინარჩუნებდა.
სწორედ ჯულიამ ასწავლა შვილს ბანჯოზე დაკვრა და ელვის პრესლის მუსიკის სიყვარული გაუღვივა. 1957 წელს მან ჯონს პირველი გიტარაც უყიდა. მიუხედავად იმისა, რომ დეიდა მიმი მუსიკალურ კარიერას სერიოზულ პროფესიად არ მიიჩნევდა, მოგვიანებით ლენონი ერთ-ერთი ყველაზე გავლენიანი მუსიკოსი გახდა.
შეხვედრა პოლ მაკარტნისთან და ისტორიის დასაწყისი
1957 წლის 6 ივლისს, ლივერპულში, წმინდა პეტრეს ეკლესიის ეზოში გამართულ ღონისძიებაზე 15 წლის პოლ მაკარტნი ჯონ ლენონის ჯგუფის, The Quarrymen-ის, გამოსვლას დაესწრო – ეს შეხვედრა ორივეს ცხოვრებაში გარდამტეხი აღმოჩნდა.
მალევე პოლი ჯგუფს შეუერთდა, მოგვიანებით კი მათ ჯორჯ ჰარისონიც დაემატა. ასე დაიწყო თანამშრომლობა, რომელმაც საბოლოოდ „ბითლზის“ შექმნამდე მივიდა.
პირველი ქორწინება და რთული ურთიერთობა შვილთან
1962 წელს ლენონმა სინტია პაუელზე იქორწინა, რომელსაც ლივერპულის ხელოვნების კოლეჯში სწავლისას შეხვდა. წყვილს ერთი ვაჟი, ჯულიან ლენონი შეეძინა.
ჯონისა და სინტიას ქორწინება 1968 წელს დასრულდა, მას შემდეგ, რაც მუსიკოსის ცხოვრებაში იოკო ონო გამოჩნდა. ჯულიანისთვის მშობლების დაშორება მტკივნეული აღმოჩნდა. მთელი ცხოვრება მამასთან რთული ურთიერთობა ჰქონდა და არაერთხელ უთქვამს, რომ ბავშვობაში ჯონისგან სათანადო ყურადღებასა და სითბოს ვერ იღებდა.
საინტერესოა, რომ ჯულიანი თავადაც მუსიკოსი გახდა, დამოუკიდებელი კარიერა შექმნა და ცნობილია ისეთი სიმღერებით, როგორებიცაა Too Late for Goodbyes და Saltwater.
„ბითლზი უფრო პოპულარულია, ვიდრე იესო“ – განცხადება, რომელმაც სკანდალი გამოიწვია
1966 წელს ჯონ ლენონის ერთ-ერთმა განცხადებამ საზოგადოებაში დიდი აჟიოტაჟი გამოიწვია. ბრიტანელმა მუსიკოსმა ინტერვიუში აღნიშნა, რომ ბითლზი იესოზე პოპულარული იყო. მისი სიტყვები განსაკუთრებით მწვავედ მიიღეს შეერთებულ შტატებში. რელიგიურმა ჯგუფებმა კი მის მუსიკის წინააღმდეგ კამპანიაც წამოიწყეს.
„Imagine“ – სიმღერა, რომელიც მშვიდობის სიმბოლოდ იქცა
ჯონ ლენონის სოლო კარიერის ყველაზე ცნობილი ნამუშევარი, „Imagine“, 1971 წელს გამოვიდა.კომპოზიცია მხოლოდ მუსიკალური ჰიტი არ ყოფილა. დროთა განმავლობაში ის მშვიდობის საერთაშორისო სიმბოლოდ იქცა. დღესაც კი სხვადასხვა ქვეყანაში მნიშვნელოვან საზოგადოებრივ მოვლენებსა თუ სამახსოვრო ღონისძიებებზე სრულდება.
იოკო ონოსთან ურთიერთობამ მისი ცხოვრება და შემოქმედება შეცვალა
ლენონი იაპონელ ხელოვან იოკო ონოს 1966 წელს შეხვდა. მათი ურთიერთობა მალევე რომანტიკულ კავშირში გადაიზარდა, 1969 წელს კი დაქორწინდნენ. წყვილი ერთად მონაწილეობდა მშვიდობის მხარდამჭერ კამპანიებში.
მათ შორის ყველაზე დასამახსოვრებელი 1969 წელს ამსტერდამსა და მონრეალში გამართული ე.წ. Bed-In for Peace იყო – მშვიდობის პროტესტი, რომლის დროსაც ლენონი და ონო სასტუმროს საწოლში ისხდნენ და ჟურნალისტებს ომის წინააღმდეგ საკუთარ პოზიციაზე ესაუბრებოდნენ.
მათი ურთიერთობა საზოგადოების მუდმივი ყურადღების ცენტრში იყო. იოკო ონოს ხშირად „ბითლზის“ დაშლაშიც კი ადანაშაულებდნენ.
ასევე დაგაინტერესებთ:
#OK! ჯონ ლენონის იშვიათი და ბევრისთვის აქამდე უცნობი 16 ვინტაჟური ფოტო არქივიდან
