6 ნოემბერს ფრანგულმა მოდის სახლმა Balenciaga-მ და მისმა მფლობელმა კომპანიამ, Kering-მა, ახალი კრეატიული დირექტორის ვინაობა ოფიციალურად დაადასტურეს. თანამდებობას ბრიტანელ-იამაიკელი დიზაინერი მარტინ როუზი დაიკავებს, რომელიც მოდის სახლის 109-წლიან ისტორიაში პირველი ქალია ამ პოზიციაზე.
მისთვის Balenciaga უცხო გარემო არ არის. 2015-2018 წლებში, დემნას ხელმძღვანელობის პერიოდში, მარტინ როუზი მოდის სახლის მამაკაცის ხაზის კონსულტანტად მუშაობდა. ამჯერად კი ის ბრენდს უკვე მთავარი შემოქმედებითი ხელმძღვანელის რანგში უბრუნდება.
მარტინ როუზი 1980 წელს, სამხრეთ ლონდონში, იამაიკური წარმოშობის ოჯახში დაიბადა. მისი შემოქმედებითი ხედვა მჭიდროდ უკავშირდება ლონდონის ქუჩის კულტურას, მუსიკას, ფეხბურთსა და 1990-იანი წლების სუბკულტურებს. დიზაინერის სტილი აერთიანებს სპორტული სამოსის ელემენტებს, თავისუფალ სილუეტებსა და კლასიკური ტანსაცმლის უჩვეულო ინტერპრეტაციებს.
2007 წელს მან საკუთარი ბრენდი Martine Rose დააარსა, რომელმაც დროთა განმავლობაში საერთაშორისო აღიარება მოიპოვა. მისი კოლექციები განსაკუთრებით ახალგაზრდულ კულტურასთან და იმ აუდიტორიასთანაა ახლოს, რომელიც მოდის ინდუსტრიაში ინდივიდუალურობასა და არასტანდარტულ ესთეტიკას ეძებს. როუზი ასევე თანამშრომლობს ისეთ ცნობილ ბრენდებთან, როგორებიცაა Nike და Supreme.
მარტინ როუზის დანიშვნა Balenciaga-ს მხრიდან დემნას ეპოქასთან დაბრუნების მცდელობადაც შეიძლება შეფასდეს. სწორედ დემნას ხელმძღვანელობის პერიოდში გახდა მოდის სახლი თანამედროვე ქუჩის კულტურის, პროვოკაციული დიზაინისა და არასტანდარტული ფორმების ერთ-ერთი ყველაზე გავლენიანი წარმომადგენელი. მისმა ხედვამ Balenciaga-ს ახალგაზრდა აუდიტორიაში განსაკუთრებული პოპულარობა მოუტანა.
დემნამ მოდის სახლი 2025 წელს დატოვა და Gucci-ს კრეატიული დირექტორი გახდა. მის ნაცვლად Balenciaga-ს სათავეში იტალიელი დიზაინერი პიერპაოლო პიჩოლი ჩაუდგა, რომელმაც ბრენდისთვის განსხვავებული, უფრო კლასიკური, დახვეწილი და კუტიურისკენ მიმართული ესთეტიკა აირჩია. თუმცა პიჩოლის ხელმძღვანელობა ხანმოკლე აღმოჩნდა – 2026 წლის 5 ნოემბერს მან თანამდებობა დატოვა.
ასევე დაგაინტერესებთ:
#OK! პიერპაოლო პიჩოლი Balenciaga-ს ტოვებს – დიზაინერი გადაწყვეტილებას ემოციური წერილით ეხმაურება
#OK! დემნა გვასალიას სახლი მილანში – დიზაინერის პირადი სივრცე იურგენ ტელერის ობიექტივში
