დემნა გვასალიას ახალი ცხოვრება ახლა მილანს უკავშირდება – ქართველი დიზაინერი იტალიური მოდის სახლის, Gucci-ს შემოქმედებით დირექტორად მუშაობის პარალელურად, დროს მილანში ატარებს. სწორედ ამ ქალაქში მდებარე მისი სახლი გახდა System Magazine-ის ახალი ნომრის მთავარი ლოკაცია.
დემნა გერმანელმა ფოტოგრაფმა იურგენ ტელერმა გადაიღო. კამერის წინ დიზაინერი როგორც პროფესიულ, ისე პირად სივრცეში გამოჩნდა და მკითხველს მისი მილანური ცხოვრების ნაწილი გააცნო.
Gucci-სთან დაკავშირებული ახალი პასუხისმგებლობების გამო მილანში ყოფნა მისი ყოველდღიურობის ნაწილად იქცა. თავად დიზაინერი ამბობს, რომ ქალაქს ახლა თავიდან ეცნობა.
“მილანში ადრე რამდენჯერმე ვყოფილვარ, მაგრამ არასდროს დავრჩენილვარ აქ ერთ დღეზე მეტხანს. ახლა ვეცნობი ქალაქს, მომწონს ის მრავალფეროვნება, რაც მას ახლავს, მომწონს ხალხიც – მომწონს მათი უშუალობა“, – ამბობს დემნა WWD-სთან საუბრისას.
დემნას გზა Balenciaga-დან Gucci-მდე
Gucci-მდე დემნას კარიერის ერთ-ერთი ყველაზე მნიშვნელოვანი ეტაპი Balenciaga-ს უკავშირდება. დიზაინერი მოდის სახლის კრეატიულ ხელმძღვანელად 2015 წელს დაინიშნა და ათი წლის განმავლობაში თანამედროვე მოდის ერთ-ერთ ყველაზე გავლენიან ფიგურად ჩამოყალიბდა.
Balenciaga-ში მუშაობის პერიოდში დემნამ მოდის სახლისთვის დამახასიათებელი სილუეტები, დიდი ზომის ფორმები და ყოველდღიური სტილის ელემენტები მაღალი მოდის ნაწილად აქცია. მისმა მიდგომამ ბრენდის ესთეტიკა მნიშვნელოვნად შეცვალა და თავად დიზაინერს საერთაშორისო მოდის ინდუსტრიაში კიდევ უფრო დიდი აღიარება მოუტანა.
2025 წელს დემნამ Balenciaga დატოვა, მოგვიანებით კი ცნობილი გახდა, რომ ის Gucci-ს ახალი კრეატიული ხელმძღვანელი გახდებოდა. ამით მის კარიერაში ახალი ეტაპი დაიწყო.
ასევე დაგაინტერესებთ:
#OK! “GEORGIANS DO IT BETTER” – დემნა, David Koma და გალიბ გასანოვი მილანის მოდის კვირეულზე
#OK! დემნა გვასალიას კაბა Gucci-ს მუზეუმში – ფლორენციაში ბრენდის ახალი გამოფენა გაიხსნა
