#OK! დემნა გვასალიას კაბა Gucci-ს მუზეუმში – ფლორენციაში ბრენდის ახალი გამოფენა გაიხსნა

ფლორენციაში, ისტორიულ Palazzo della Mercanzia-ში, Gucci-ს ახალი საგამოფენო სივრცე გაიხსნა, სადაც მოდის სახლის 105-წლიანი ისტორია არის წარმოდგენილი. Gucci Storia-ს სახელით შექმნილი გამოფენა დემნა გვასალიას კურატორული ხედვის ნაწილია და მოდის სახლის წარსულს, აწმყოსა და მომავალს აერთიანებს.

გამოფენის ერთ-ერთი პირველი სივრცე „დროის ძაფია“, სადაც უზარმაზარი გობელენები Gucci-ს ისტორიას რენესანსის მხატვრობისთვის დამახასიათებელი ვიზუალური ენით მოგვითხრობს.

მათ შორის გამოსახულია როგორც ბრენდის დამფუძნებელი გუჩო გუჩი, ისე სხვადასხვა ეპოქის კრეატიული დირექტორები. ისტორიის ბოლო ნაწილში კი დემნაა წარმოდგენილი – ის თითქოს სახელოსნოში მუშაობს და წითელ ქურთუკს ქმნის.

რა არის Gucci Storia?

Gucci Storia ფლორენციის XIV საუკუნის ისტორიულ Palazzo della Mercanzia-ში, Piazza della Signoria-ზე მდებარეობს. შენობა Gucci-სთვის განსაკუთრებული მნიშვნელობის მატარებელია – სწორედ ფლორენციაში დაიწყო ბრენდის ისტორია 1921 წელს. შენობა წლების განმავლობაში უკვე რამდენჯერმე გადაკეთდა: 2011 წელს აქ Gucci-ს მუზეუმი გაიხსნა, 2018 წელს კი სივრცე Gucci Garden-ად გადაკეთდა. მისი ახალი ეტაპი კი დემნას სახელთან არის დაკავშირებული.

Gucci Storia-ს კონცეფცია ტრადიციული მუზეუმისგან განსხვავდება. აქ სტუმარი უბრალოდ ვიტრინებში მოთავსებულ ისტორიულ ნივთებს არ ათვალიერებს – ის Gucci-ს სამყაროში ოთახიდან ოთახში გადაინაცვლებს, სადაც ერთმანეთს ხვდება მოდა, ხელოვნება, ტექნოლოგია  და თავად ბრენდის ისტორია.

გამოფენის ერთ-ერთი ყველაზე საინტერესო ნაწილი Archive-ია. ეს სივრცე ჩვეულებრივ მუზეუმის არქივს ნაკლებად ჰგავს და უფრო საგანძურის ოთახის შთაბეჭდილებას ტოვებს. უჯრებსა და ვიტრინებში Gucci-ს ისტორიისთვის დამახასიათებელი, ერთმანეთისგან სრულიად განსხვავებული ნივთებია თავმოყრილი – ჩანთები, შარფები, ჩოგბურთის აქსესუარები, საპარსი კომპლექტები, პიკნიკის ნივთები და სხვა უცნაური თუ საკულტო არტეფაქტები.

ერთ-ერთი ყველაზე შთამბეჭდავი სივრცე Material Room-ია – ოთახი, სადაც განათება მინიმალისტურია და ყურადღება მთლიანად ქსოვილებზე, მათ ტექსტურასა და დეკორატიულ დეტალებზე გადადის. აქ Gucci-ს სხვადასხვა ეპოქის ნამუშევრებია თავმოყრილი.

სწორედ ამ სივრცეში გვხვდება დემნას ერთ-ერთი უახლესი ნამუშევარი – კაბა ერთი შეხედვით სამოსზე მეტად ძვირფასეულობის უზარმაზარ კომპოზიციას ჰგავს.  სინათლის დაცემისას ქსოვილი თითქოს ცალკეულ ქვებად იშლება და მთლიანობაში მოზაიკის ეფექტს ქმნის. სწორედ ეს უხვი დეკორაცია აქცევს მას Material Room-ის ერთ-ერთ ყველაზე თვალშისაცემ ნამუშევრად.

ასევე დაგაინტერესებთ:

#OK! “დემნა არის მაგალითი იმისა, თუ როგორ უნდა “ადამიანობდეს ადამიანი” – დემნა გვასალია ნიუ-იორკში ქართულ რესტორან „უბანს“ ესტუმრა

#OK! GUCCI PRIMAVERA-დემნას პირველი ჩვენება მოდის სახლისთვის