7 ნოემბერს, Tbilisi Factory-ში, Mercedes-Benz Fashion Week-ის მორიგი ჩვენება გაიმართა. ღონისძიების ფარგლებში ქართველმა და უცხოელმა დიზაინერებმა ახალი კოლექციები წარადგინეს და სტუმრებს თანამედროვე მოდის განსხვავებული ხედვა და შემოქმედებითი მიმართულებები გააცნეს.
ჩვენება აზერბაიჯანული მოდის სახლი UVENTA-ს კოლექციით გაიხსნა.
UVENTA 2012 წელს დაარსებული მოდის სახლია, რომლის საქმიანობაც ინდივიდუალური შეკვეთით შექმნილი სამოსით დაიწყო. ბრენდის მთავარი მიზანი მომხმარებლის სურვილებსა და ინდივიდუალურ ზომებზე მორგებული, მაღალი ხარისხის სამოსის შექმნა იყო. 2016 წლიდან კი მოდის სახლმა Ready-to-Wear მიმართულებაც განავითარა და მზა კოლექციების წარმოება დაიწყო.
UVENTA-ს შემდეგ, Mercedes-Benz Fashion Week Tbilisi-ის პროგრამაში ლონდონში მოღვაწე პერუელი დიზაინერი Genaro Rivas იყო წარმოდგენილი. ის საერთაშორისო მოდის ინდუსტრიაში მდგრადი მოდის, ტრადიციული ხელობისა და თანამედროვე ტექნოლოგიების გაერთიანებით გამოირჩევა.
Rivas-ის შემოქმედებაში განსაკუთრებული ადგილი უჭირავს პერუს კულტურულ მემკვიდრეობას. დიზაინერი საკუთარ ნამუშევრებში ქვეყნის ტრადიციულ ხელობასა და ტექსტილის ტექნიკას თანამედროვე დიზაინთან აერთიანებს. მისი მიზანია, მოდა მხოლოდ ესთეტიკურ გამოხატულებად არ დარჩეს და სოციალური და გარემოსდაცვითი მნიშვნელობაც შეიძინოს.
7 ნოემბრის პროგრამაში წარმოდგენილი იყო კიდევ ერთი საინტერესო ბრენდი – Unknown Artisan, რომელიც მილანში მოღვაწე ქართველ დიზაინერს, ლიკა ყუბანეიშვილს ეკუთვნის.
Unknown Artisan-ის კონცეფციის მთავარი ელემენტი ერთი ერთი შეხედვით მარტივი, თუმცა მრავალმხრივი სამოსია – პერანგი. ბრენდი სწორედ ამ ფორმის გარშემო ავითარებს საკუთარ ესთეტიკას და ქმნის განსხვავებული სილუეტების, კონსტრუქციებისა და დეტალების მქონე მოდელებს. თითოეული მათგანი ხელით მზადდება, შეზღუდული რაოდენობით და მაღალი ხარისხის იტალიური ბუნებრივი ქსოვილებისგან.
7 ნოემბრის ჩვენებებზე განსაკუთრებული ადგილი ეკავა ქართველ დიზაინერ თამუნა ქარუმიძის ბრენდ TAMRA-საც. მისი ჩვენება ტრადიციული მოდის ჩვენებისგან განსხვავებული, არტისტული და თეატრალური ხასიათით გამოირჩეოდა. დიზაინერისთვის პოდიუმი მხოლოდ ახალი სამოსის წარდგენის სივრცე არ არის – ის ამბის მოყოლისა და საკუთარი შემოქმედებითი სამყაროს მაყურებლისთვის გაზიარების საშუალებაა.
ასევე დაგაინტერესებთ:
