ბრიუს უილისის ჯანმრთელობის მდგომარეობის შესახებ გავრცელებული ახალი ცნობები კვლავ განხილვის თემად იქცა. 71 წლის მსახიობი ფრონტოტემპორალურ დემენციას ებრძვის. ბოლო ინფორმაციით, დაავადება პროგრესირებს, მსახიობს ყოველდღიურ ცხოვრებაში მუდმივი დახმარება სჭირდება, მის მოვლას კი ოჯახი განსაკუთრებულ ყურადღებას უთმობს.
გამოცემა Men’s Journal-ის ცნობით, უილისი ახლა ცალკე, სპეციალურად მის საჭიროებებზე მორგებულ სახლში ცხოვრობს, პროფესიონალები კი სადღეღამისო რეჟიმში უვლიან. ეს გადაწყვეტილება მისი მეუღლისთის, ემა ჰემინგისთვის, მარტივი არ ყოფილა, თუმცა, როგორც თავად განმარტავს, სურდა, მათი ორი მცირეწლოვანი ქალიშვილისთვის – მეიბლისა და ეველინისთვის – ყოველდღიური ცხოვრება მაქსიმალურად ჩვეულებრივი ყოფილიყო.
„ეს ძალიან რთული გადაწყვეტილებაა, რომელიც მარტივად არ მოდის. ამაში დიდი დანაშაულის და სირცხვილის გრძნობაა ჩადებული. ეს არ ნიშნავს, რომ თქვენ, როგორც მომვლელი, წარუმატებელი ხართ. ეს ნიშნავს, რომ დაავადება სხვა სახის ზრუნვასა და მხარდაჭერას ითხოვს. ეს სიყვარულის აქტია.
უპირველეს ყოვლისა, ვიცოდი, რომ ბრიუსსაც სწორედ ეს ენდომებოდა ჩვენი ქალიშვილებისთვის. ისურვებდა, რომ გოგონებს ისეთ სახლში ეცხოვრათ, რომელიც მათ საჭიროებებზე იქნებოდა მორგებული და არა მისაზე“.
გამოცემის ინფორმაციით, მსახიობის მოვლისთვის მისი მეუღლე თვეში 30 000 დოლარზე მეტს ხარჯავს.
უილისის მდგომარეობა ბოლო პერიოდში კიდევ უფრო შეიცვალა. ანონიმური წყაროს განცხადებით, ბრიუსი ხშირად საკუთარ სამყაროშია ჩაკეტილი, ზოგჯერ კი გარემოს დიდი ინტერესით აკვირდება,თითქოს მის გარშემო არსებულ ნივთებს პირველად ხედავდეს. გარდა ამისა, გაცილებით ჩუმი გახდა და უჭირს საკუთარი აზრების სიტყვებით გადმოცემა.
ბრიუს უილისს ფრონტოტემპორალური დემენცია (FTD) აქვს – პროგრესირებადი ნეიროდეგენერაციული დაავადება, რომელიც თავის ტვინის შუბლისა და საფეთქლის ნაწილებს აზიანებს. სწორედ ეს უბნები მონაწილეობს მეტყველების, ქცევის, პიროვნული მახასიათებლებისა და ემოციების მართვაში. დაავადების შედეგად ადამიანს შესაძლოა თანდათან გაუჭირდეს საუბარი, აზრების გამოხატვა, სხვებთან კომუნიკაცია და ყოველდღიური მოქმედებების შესრულება.
მსახიობის ჯანმრთელობის პრობლემების შესახებ ოჯახმა პირველად 2022 წლის მარტში განაცხადა. მაშინ ცნობილი გახდა, რომ ბრიუსს აფაზია ჰქონდა – მდგომარეობა, რომელიც მეტყველებისა და ენის გაგების უნარზე მოქმედებს. ამის გამო მან კარიერის დასრულება გადაწყვიტა. 2023 წლის თებერვალში კი ოჯახმა დაადასტურა, რომ ჩატარებული გამოკვლევების შედეგად უილისს ფრონტოტემპორალური დემენციის დიაგნოზი დაუსვეს.
მნიშვნელოვანია, რომ ფრონტოტემპორალური დემენცია ალცჰაიმერის დაავადებისგან განსხვავდება. ის თავდაპირველად მეტყველების, ქცევისა და პიროვნული ცვლილებებით ვლინდება. დაავადება პროგრესირებადია და მისი განკურნების მეთოდი ამჟამად არ არსებობს.
ასევე დაგაინტერესებთ:
#OK! „მის ტვინს მეცნიერებს გადავცემთ“ – ბრიუს უილისის ოჯახი მსახიობის გარდაცვალებისთვის ემზადება
#OK! ბრიუს უილისის მდგომარეობა დამძიმდა – მსახიობი დემი მურს ვეღარ ცნობს
