ქეით მიდლტონმა სიმსივნის დიაგნოზის შემდეგ გავლილი რთული პერიოდის შესახებ ისაუბრა. Country Life-ის ინტერვიუში უელსის პრინცესამ გაამხილა, რომ გამოჯანმრთელების გაზაზე მძიმე დღეების გადალახვაც მოუწია, ხოლო ბუნებაში ყოფნა მისთვის ძალების აღდგენისა და შინაგანი სიმშვიდის პოვნის ერთ-ერთ მნიშვნელოვან საშუალებად იქცა.
„საავადმყოფოში ყოფნისას ექიმებმა გამაფრთხილეს, რომ გამოჯანმრთელების პროცესი თანმიმდევრული არ იქნებოდა – მექნებოდა როგორც კარგი, ისე რთული დღეები და სრულად ძალების აღდგენას დრო დასჭირდებოდა. ბუნებაშიც ასეა: დასვენების, დაფიქრებისა და ძალების აღდგენის პერიოდები ისეთივე მნიშვნელოვანია, როგორც ზრდისა და წინსვლის ეტაპები.
ჩემი პირადი გამოცდილების შემდეგ კიდევ უფრო დავრწმუნდი, რომ დაავადებასა და გამოჯანმრთელებას კომპლექსურად უნდა შევხედოთ. მძიმე ავადმყოფობა, რა თქმა უნდა, უამრავ ფიზიკურ სირთულეს უკავშირდება, თუმცა არ უნდა დაგვავიწყდეს ჩვენი შინაგანი სამყაროც და ის, თუ როგორ აისახება ეს ყველაფერი ჩვენზე ემოციურად.
ბუნება განსაკუთრებულ რამეს გვთავაზობს: ის არაფერს ითხოვს ჩვენგან, არ განგვსჯის და არც რაიმეს დამტკიცებას გვთხოვს. უბრალოდ, გვაძლევს შესაძლებლობას, ვიყოთ ისეთები, როგორებიც ვართ. ჩემთვის ის ნამდვილ თავშესაფრად იქცა – ადგილად, სადაც ყოფნა ყოველთვის სიმშვიდეს მანიჭებს“, – განაცხადა პრინცესამ.
ქეით მიდლტონის სიმსივნის დიაგნოზი
ქეით მიდლტონმა სიმსივნის დიაგნოზის შესახებ საზოგადოებას 2024 წლის მარტში, ვიდეომიმართვით შეატყობინა. მანამდე, იმავე წლის იანვარში, პრინცესამ მუცლის ღრუს ოპერაცია გაიკეთა. მოგვიანებით ჩატარებული გამოკვლევების შედეგად ექიმებმა სიმსივნე აღმოაჩინეს და მას პრევენციული ქიმიოთერაპიის კურსის გავლა ურჩიეს.
პრინცესას დიაგნოზის კონკრეტული ტიპი საჯაროდ არასდროს გაუმხელია. 2024 წლის სექტემბერში მან ქიმიოთერაპიის დასრულების შესახებ განაცხადა, თუმცა მაშინვე განმარტა, რომ ჩვეულ ცხოვრებასთან დაბრუნებას და ძალების აღდგენას დრო დასჭირდებოდა.
ასევე დაგაინტერესებთ:
ქეით მიდლტონი და პრინცესა შარლოტა ლონდონის მეტროში გადაიღეს – დედა-შვილის მოულოდნელი გამოჩენა
