ქეით მიდლტონმა და პრინცესა შარლოტამ ლონდონელები მოულოდნელი გამოჩენით გააკვირვეს. უელსის პრინცესა 11 წლის ქალიშვილთან ერთად საზოგადოებრივი ტრანსპორტით მგზავრობდა – დედა-შვილის ვიდეო სოციალურ ქსელებში გავრცელდა.
როგორც უცხოური მედია წერს, ქეითი და შარლოტა ლონდონის Elizabeth Line-ის მატარებელში 10 ოქტომბერს გადაიღეს. ისინი სხვა მგზავრების გვერდით ისხდნენ და მათთან საუბარსაც არ ერიდებოდნენ. ეს შარლოტასთვის, სავარაუდოდ, ლონდონის საზოგადოებრივი ტრანსპორტით მგზავრობის პირველი გამოცდილება იყო.
თვითმხილველების თქმით, პრინცესა შარლოტა გარემოს ინტერესით აკვირდებოდა, ქეითი კი თავს თავისუფლად გრძნობდა – გარკვეული დრო ტელეფონს უყურებდა, შემდეგ კი ქალიშვილთან საუბრობდა და იღიმოდა.
ქეითმა და შარლოტამ მატარებელი Tottenham Court Road-ის სადგურზე დატოვეს. უცნობია, სად წავიდნენ, თუმცა სადგური ლონდონის ცენტრში, სავაჭრო ქუჩებისა და თეატრების სიახლოვეს მდებარეობს.
ეს არ არის პირველი შემთხვევა, როდესაც უელსის პრინცესა საზოგადოებრივი ტრანსპორტით სარგებლობს. 2023 წელს მან პრინც უილიამთან ერთად იმავე ხაზით იმგზავრა და კორონაციის კვირეულის განმავლობაში მომუშავე ადამიანებისთვის მადლობის გადასახდელად სოჰოს ერთ-ერთ პაბსაც ესტუმრა.
ასევე დაგაინტერესებთ:
#OK! Vogue -მა ქეით მიდლტონი 2025 წლის ყველაზე მოდურ ცნობილ ადამიანად აღიარა
