ჯონი დეპი „კარიბის ზღვის მეკობრეების“ მეექვსე ნაწილში ჯეკ ბეღურას როლის შესრულების შესაძლებლობას არ გამორიცხავს. მსახიობის განცხადებით, ფრენჩაიზში დაბრუნებას მხოლოდ იმ შემთხვევაში დათანხმდება, თუ ახალ ფილმს ღირსეული დასასრული ექნება.
მსახიობმა განსაკუთრებული ყურადღება გაამახვილა პროდიუსერ ჯერი ბრუკჰაიმერთან ურთიერთობაზეც. მისი თქმით, მათ მრავალწლიანი მეგობრობა აკავშირებთ და ბრუკჰაიმერთან თანამშრომლობისთვის მზად ყოველთვის იქნება.
„ერთადერთი, რაც ნამდვილად მსურს, არის ამ ისტორიის უკეთესად დასრულება. ხვალვე წავიდოდი ჯერი ბრუკჰაიმერთან სამუშაოდ, მნიშვნელობა არ აქვს, რა პროექტი იქნება. თუ საქმე ჯერის ეხება, მას ვენდობი. ჩვენ ღრმა მეგობრობა გვაკავშირებს“, – განაცხადა დეპმა.
ამ ეტაპზე ჯონი დეპის დაბრუნება ოფიციალურად დადასტურებული არ არის. ცნობილია მხოლოდ ის, რომ მხარეებს შორის მოლაპარაკებები მიმდინარეობს და მეექვსე ფილმის სცენარი განვითარების პროცესშია. უცნობია ისიც, თუ კონკრეტულად რა როლი ექნება ახალ ისტორიაში ჯეკ ბეღურას.
პროექტთან წლების განმავლობაში მარგო რობის სახელიც იყო დაკავშირებული, ხოლო გავრცელებული ცნობებით, ფილმი შესაძლოა ახალ მთავარ გმირებზე იყოს ფოკუსირებული, ჯეკ ბეღურა კი ისტორიაში შედარებით მცირე, თუმცა მნიშვნელოვან როლს შეასრულებს.
საინტერესოა ისიც, რომ რამდენიმე წლის წინ თავად ჯონი დეპი „კარიბის ზღვის მეკობრეებში“ დაბრუნებას კატეგორიულად გამორიცხავდა. 2022 წლის სასამართლო პროცესზე მსახიობმა განაცხადა, რომ Disney-მ მასთან თანამშრომლობა ემბერ ჰერდთან დაკავშირებული სკანდალის ფონზე შეწყვიტა. დეპი ამბობდა, რომ სტუდიამ მისგან დისტანცირება არჩია, თუმცა ჯეკ ბეღურას პერსონაჟს კვლავ კომერციული მიზნებისთვის იყენებდა.
მაშინ დეპის პოზიცია განსაკუთრებით მკაფიო იყო – მსახიობი ამბობდა, რომ Disney-მ მას ზურგი აქცია და მას შემდეგ სტუდიასთან თანამშრომლობის სურვილი აღარ ჰქონდა.
შეგახსენებთ, რომ ჯონი დეპი კაპიტან ჯეკ ბეღურას როლში პირველად 2003 წელს, ფილმში Pirates of the Caribbean: The Curse of the Black Pearl გამოჩნდა. პერსონაჟი მაყურებლისთვის ერთ-ერთ ყველაზე დასამახსოვრებელ კინოგმირად იქცა -მსახიობმა ის ფრენჩაიზის ხუთივე ნაწილში განასახიერა. ბოლო ფილმი, Pirates of the Caribbean: Dead Men Tell No Tales, ეკრანებზე 2017 წელს გამოვიდა.
ასევე დაგაინტერესებთ:
#OK! ჯონი დეპი დიდ ეკრანზე ბრუნდება – მსახიობი ახალ ფილმში ებენეზერ სკრუჯის როლს ასრულებს
