როდის ხდება ქალი მოდის სიმბოლო, როგორ ახერხებს ის მოდის სამყაროზე გავლენის მოხდენას და ისეთ სტილის შექმნას, რომელიც დღემდე კლასიკად ითვლება?
ოდრი ჰეპბერნმა „პატარა შავი კაბა“ საღამოს გამოსასვლელ სტილად აქცია, კეიტ მოსმა კი 90-იანების კაბა-კომბინიზონი ახალ მოდურ ტრენდად. გასულ საუკუნეში, ქალები, რომლებიც დიზაინერების, ფოტოგრაფების, კინემატოგრაფისტების ან მხატვრების მუზებად იქცნენ თავიანთი სტილითა და გარეგნობით სილამაზის ახალი იდეალები შექმნეს.
წარმოგიდგენთ 3 ქალბატონს, რომელმაც ზუსტად იცოდა, როგორ უნდა გაეოცებინა თავისი გარეგნობით მსოფლიო.
ოდრი ჰეპბერნი
„ელეგანტურობა ერთადერთია, რაც არასოდეს ქრება!“ – ეს სიტყვები ეკუთვნის ქალს, რომლის სტილმა მოდაზე დიდი გავლენა მოახდინა და ბევრი ქალი შთააგონა. სცენა ფილმიდან „საუზმე ტიფანისთან“ მხოლოდ ორი წუთი და ოცდაათი წამი გაგრძელდა, მაგრამ შავ კაბაში გამოწყობილი ქალი, რომელიც ნიუ-იორკში, Tiffany-ის მაღაზიის ვიტრინასთან დგას მოდის ისტორიაში სამუდამოდ დარჩა.
ოდრი ჰეპბერნმა Givenchy-ის „პატარა შავი კაბა“ საღამოსთვის განკუთვნილ ელეგანტურ სამოსად და მარადიულ კლასიკად აქცია. მისი ბუნებრივი ელეგანტურობა და სილამაზე 1950-იანი წლების სტილის სინონიმად იქცა, როგორც მაცდური, ქერა მერლინ მონროს ალტერნატივა.
გრეის კელი
ის 1950-იანების ქალურობისა და ელეგანტურობის სიმბოლოდ ითვლებოდა და ჰოლივუდის ერთ-ერთი ყველაზე წარმატებული ვარსკვლავი იყო.
გრის კელის შთაგონებით მოდის ფრანგულმა სახლმა Hermès-მა მისი საყვარელი აქსესუარი – ცნობილი Kelly Bag შექმნა. „კელის სტილი“ უწოდეს თავსაფრის განსხვავებულად ტარების მანერასაც.
გრეისმა წითელი ტიჩსაცხი საკუთარი სტილის ნაწილად აქცია. მონაკოს პრინცესას მუდამ საუკეთესო დიზაინერების – Balenciaga, Chanel, Dior და Yves Saint Laurent-ის კაბები ეცვა, თუმცა შარვლისა და ბლუზის კომბინაციებიც ძალიან უყვარდა.
ლედი დაიანა
ის იყო ქალი გამორჩეული და დახვეწილი სტილის შეგრძნებით, რომელიც მოდას ქმნიდა და ამავდროულად, სასახლის პროტოკოლს ხშირად არღვევდა. პრინცესა დაიანას ჩაცმულობა ზოგჯერ ბრიტანეთის სამეფო ოჯახისთვის ომის გამოცხადებას ჰგავდა.
მოკლე ქვედაბოლოები, მინი-კაბები, შორტებისა და გრძელი სვიტერების შეხამება – ეს ყველაფერი ლედი დის განუმეორებელ სტილს ქმნიდა.
პრინც ჩარლზთან ქორწინების შემდეგ, დიანას სტილის შეგრძნება კიდევ უფრო გამოიკვეთა და მისი ცხოვრების ნაწილად იქცა. ბევრი ბრენდი საკუთარ კოლექციებს დღესაც უელსის პრინცესას სტილის ინსპირაციით ქმნის, ამდენად გასაკვირი არ არის, რომ უელსის პრინცესა ისტორიაში შევიდა, როგორც ყველაზე გემოვნებიანი ქალი და მოდის ლეგენდების რიგებს შეუერთდა.
