ჯონი დეპი შესაძლოა „კარიბის ზღვის მეკობრეების“ მეექვსე ნაწილში ვიხილოთ – ფილმის პროდიუსერმა ჯერი ბრუკჰაიმერმა დაადასტურა, რომ მსახიობთან მოლაპარაკებები უკვე მიმდინარეობს და ფილმის სცენარზე მუშაობაც დაწყებულია.
„ჯონის ვესაუბრებით. სცენარზე ვმუშაობთ და იმედი გვაქვს, რომ ამას შევძლებთ“, – განაცხადა პროდიუსერმა Disney-ის D23 ღონისძიებაზე.
ამ ეტაპზე ჯონი დეპის დაბრუნება ოფიციალურად დადასტურებული არ არის. ცნობილია მხოლოდ ის, რომ მხარეებს შორის მოლაპარაკებები მიმდინარეობს და მეექვსე ფილმის სცენარი განვითარების პროცესშია. უცნობია ისიც, თუ კონკრეტულად რა როლი ექნება ახალ ისტორიაში ჯეკ ბეღურას.
პროექტთან წლების განმავლობაში მარგო რობის სახელიც იყო დაკავშირებული, ხოლო გავრცელებული ცნობებით, ფილმი შესაძლოა ახალ მთავარ გმირებზე იყოს ფოკუსირებული, ჯეკ ბეღურა კი ისტორიაში შედარებით მცირე, თუმცა მნიშვნელოვან როლს შეასრულებს.
საინტერესოა ისიც, რომ რამდენიმე წლის წინ თავად ჯონი დეპი „კარიბის ზღვის მეკობრეებში“ დაბრუნებას კატეგორიულად გამორიცხავდა. 2022 წლის სასამართლო პროცესზე მსახიობმა განაცხადა, რომ Disney-მ მასთან თანამშრომლობა ემბერ ჰერდთან დაკავშირებული სკანდალის ფონზე შეწყვიტა. დეპი ამბობდა, რომ სტუდიამ მისგან დისტანცირება არჩია, თუმცა ჯეკ ბეღურას პერსონაჟს კვლავ კომერციული მიზნებისთვის იყენებდა.
მაშინ დეპის პოზიცია განსაკუთრებით მკაფიო იყო – მსახიობი ამბობდა, რომ Disney-მ მას ზურგი აქცია და მას შემდეგ სტუდიასთან თანამშრომლობის სურვილი აღარ ჰქონდა.
ჯონი დეპმა კაპიტანი ჯეკ ბეღურა პირველად 2003 წელს, „კარიბის ზღვის მეკობრეების“ პირველ ფილმში განასახიერა. პერსონაჟი მსახიობის კარიერის ერთ-ერთ ყველაზე ცნობილ როლად იქცა. სერიის ხუთმა ნაწილმა მსოფლიო კინოგაქირავებაში 4.5 მილიარდ დოლარზე მეტი გამოიმუშავა, ბოლო ფილმი კი – „კარიბის ზღვის მეკობრეები: მკვდრები ზღაპრებს არ ჰყვებიან“ – 2017 წელს გამოვიდა.
