კენდალ ჯენერის სახელი მოდის სამყაროს განუყოფელი ნაწილია – იგი უკვე წლებია მსოფლიოს წამყვანი ბრენდების კამპანიებსა და ჩვენებებში მონაწილეობს, თუმცა ბოლო დროს საკუთარი კარიერის კიდევ ერთი მიმართულება შექმნა – 2021 წელს ბიზნესი წამოიწყო და ალკოჰოლური სასმელის ბრენდი, 818 Tequila დააარსა.
818-ის შექმნის ისტორია კენდალისთვის უცხო სფეროდან არ დაწყებულა. მოდელის თქმით, ოჯახში ტეკილა ყოველთვის პოპულარული სასმელი იყო და სწორედ ამ ინტერესმა გაუჩინა სურვილი, თავადაც შეექმნა საკუთარი ბრენდი.
თავდაპირველად სხვადასხვა სახეობის ტეკილას დაგემოვნება დაიწყო, შეისწავლა პროდუქტის წარმოების პროცესი და საბოლოოდ გადაწყვიტა, შეექმნა სასმელი, რომელსაც თავადაც სიამოვნებით დალევდა. თუმცა იდეიდან რეალურ პროდუქტამდე მისვლას დრო და ბევრი მუშაობა დასჭირდა.
ბრენდის სახელიც კენდალის პირად ისტორიას უკავშირდება. 818 ლოს-ანჯელესის სან-ფერნანდოს ველის სატელეფონო კოდია – სწორედ იმ ადგილის, სადაც კენდალი გაიზარდა.
„მინდოდა, შემექმნა რაღაც, რაც ჩემთვის მნიშვნელოვანი იქნებოდა“, – მოდელი 818-ის შესახებ საუბრისას ხშირად აღნიშნავს, რომ ბრენდის შექმნა მისთვის მხოლოდ ბიზნესპროექტი არ ყოფილა.
იმასაც არ მალავს, რომ ბრენდის განვითარებაში მოდის სამყაროში მიღებული გამოცდილებაც ეხმარება. 818-ისთვის პროდუქტის გარდა მნიშვნელოვანია შეფუთვა, ფოტოგრაფია, კამპანიები, ღონისძიებები და სოციალური მედიის ვიზუალური მხარე.
რას წარმოადგენს 818?
818 Tequila მექსიკაში, ხალისკოს რეგიონში იწარმოება – ბრენდი ადგილობრივ, საოჯახო მეურნეობებთან თანამშრომლობს და პროდუქტის დასამზადებლად 100%-იან Weber Blue Agave-ს იყენებს.
818-ის ხაზში შედის რამდენიმე სახეობა: Blanco, Reposado, Añejo და უფრო მაღალი კატეგორიის Eight Reserve.
ბრენდის საქმიანობა მხოლოდ პროდუქტის გაყიდვით არ შემოიფარგლება. 818 ადგილობრივ პარტნიორებთან თანამშრომლობს და სოციალური და გარემოსდაცვითი მიმართულებების პროექტებშიც მონაწილეობს. კომპანია 1% for the Planet-ის წევრია და სხვადასხვა ინიციატივის ფარგლებში გარემოსა და ადგილობრივი თემების მხარდაჭერაზე მუშაობს.
აპრილში ცნობილი გახდა, რომ ალკოჰოლური სასმელების მწარმოებელმა Sazerac-მა 818-IS წილი შეიძინა და კომპანიასთან სტრატეგიული პარტნიორობა გააფორმა.
Sazerac ამერიკული კომპანიაა, რომელიც ალკოჰოლური სასმელების ინდუსტრიაში ერთ-ერთი უმსხვილესი მოთამაშეა. ამას გარდა, არაერთ ცნობილ ბრენდს ფლობს, მათ შორის Buffalo Trace, Fireball, Southern Comfort და Pappy Van Winkle-ს.
2022 წელს 818-ის გაყიდვებმა დაახლოებით 25 მილიონ დოლარს მიაღწია. შემდეგ წლებში ბრენდის მასშტაბი კიდევ გაიზარდა. ინდუსტრიული შეფასებების მიხედვით, 2024 წლისთვის 818-ის წლიური მთლიანი შემოსავალი დაახლოებით 45–50 მილიონ დოლარს შეადგენდა.
„ძალიან ვამაყობ იმით, სადაც დღეს ვართ“, – ამბობს კენდალი და აღნიშნავს, რომ 818-ის შექმნისას თავადაც ბევრი რამ ისწავლა – როგორც ბიზნესის, ისე გუნდის მართვისა და ბრენდის განვითარების შესახებ.
დღეს 818-ის ისტორია მხოლოდ ბიზნესპროექტი აღარ არის – რა თქმა უნდა, მოდელის ცნობადობამ ბრენდს დასაწყისში დიდი ყურადღება მოუტანა, თუმცა ხუთი წლის შემდეგ 818 უკვე საკუთარი პროდუქტით, იდენტობითა და ბიზნესსტრატეგიით ვითარდება.
ასევე დაგაინტერესებთ:
#OK!BusinessCelebrity BERO – როგორ აქცია ტომ ჰოლანდმა პირადი გამოცდილება უალკოჰოლო ლუდის ბიზნესად
