#OK!BusinessCelebrity Honest Company – როგორ აქცია ჯესიკა ალბამ პირადი გამოცდილება მილიარდიან ბიზნესად

ჯესიკა ალბას სახელი ჰოლივუდთან, კინოსა და მოდასთან ასოცირდება, თუმცა მისი ყველაზე მნიშვნელოვანი ბიზნესწარმატება კამერების მიღმა შეიქმნა. მსახიობმა პირადი გამოცდილებით შთაგონებული იდეა რეალურ ბიზნესად აქცია და Honest Company შექმნა — კომპანია, რომელიც უსაფრთხო და ეფექტურ სამომხმარებლო პროდუქტებს სთავაზობდა ოჯახებს და რომელმაც ვარსკვლავს 1 მილიარდ დოლარიანი შემოსავალი მოუტანა

იდეა მაშინ გაჩნდა, როდესაც ალბა პირველი შვილის დაბადებას ელოდებოდა. ბავშვის ტანსაცმლის გარეცხვის შემდეგ მას ძლიერი ალერგიული რეაქცია დაეწყო. მსახიობმა პროდუქტის შემადგენლობის შესწავლა დაიწყო და აღმოაჩინა, რომ ზოგიერთი პოტენციურად მავნე ნივთიერება ეტიკეტზე უბრალოდ „fragrance“-ის სახელით შეიძლებოდა ყოფილიყო მითითებული. სწორედ მაშინ გადაწყვიტა, შეექმნა ისეთი პროდუქტები, რომლებიც ოჯახებისთვის უსაფრთხო, ეფექტური, ვიზუალურად მიმზიდველი და ხელმისაწვდომი იქნებოდა, თუმცა მის ბიზნესად ქცევას რამდენიმე უარი და დაბრკოლება მოჰყვა.

2012 წელს კომპანიამ საქმიანობა მხოლოდ 17 პროდუქტით დაიწყო — ძირითადად საფენებითა და სველი ხელსახოცებით. თავდაპირველი მოდელი მომხმარებლებისთვის პროდუქციის სახლში ყოველთვიურად მიწოდებასაც მოიცავდა. უკვე პირველივე წელს Honest-ის გაყიდვებმა $10 მილიონს მიაღწია. რამდენიმე წელიწადში კი ასორტიმენტი 135-ზე მეტ პროდუქტამდე გაიზარდა და კომპანიამ ონლაინგაყიდვებთან ერთად 4 400 საცალო მაღაზიაში დაიწყო პროდუქციის გაყიდვა. ამ ეტაპზე გაყიდვებმა $150 მილიონს გადააჭარბა.

Honest-ის ზრდას ინვესტიციებიც მოჰყვა. Series D-ის დაფინანსების რაუნდში კომპანიამ $100 მილიონი მოიზიდა და 1 მილიარდდოლარიან სტარტაპად — ე.წ. „unicorn“-ად — იქცა. იმავე პერიოდში Honest საერთაშორისო ბაზრებზეც გაფართოვდა და კორეის ბაზარზე შევიდა.

ალბასთვის ეს მხოლოდ დამატებითი ბიზნესი არ ყოფილა. მსახიობმა კომპანიაში თავიდანვე აქტიური როლი აიღო — მონაწილეობდა პროდუქციის, შეფუთვის, ვიზუალური იდენტობისა და მარკეტინგული კამპანიების გადაწყვეტილებებში. მისი მიდგომა მარტივი იყო: მომხმარებელთან კავშირის შესაქმნელად მხოლოდ ცნობილი სახის იმიჯი საკმარისი არ არის. სწორედ ამ მიზეზით Honest-ის მოდელმა სხვა სელებრითებისთვისაც შექმნა ახალი მაგალითი — ვარსკვლავი მხოლოდ პროდუქტის სახე კი არა, თავად ბიზნესის აქტიური შემქმნელი გახდა.

ჯესიკა ალბას ისტორია სწორედ ამიტომ არის საინტერესო: ჰოლივუდში მიღებულმა ცნობადობამ მას ბიზნესის დაწყებაში შესაძლოა ყურადღება მოუტანა, მაგრამ Honest-ის წარმატება მხოლოდ სახელზე არ დაფუძნებულა. პირადი პრობლემა მან ბაზრის საჭიროებად დაინახა, შემდეგ კი იდეა პროდუქტად, კომპანიად და საბოლოოდ მრავალმილიონიან ბიზნესად აქცია.

ასევე დაგაინტერესებთ

#OK!BusinessCelebrity – პერის ჰილტონის მრავალმილიარდიანი ბიზნეს იმპერია