ტომ ჰოლანდის სახელი ბევრისთვის ჰოლივუდთან, „Spider-Man“-თან და მის მიერ შესრულებულ არაერთ ცნობილ როლთან ასოცირდება, თუმცა მსახიობმა რამდენიმე წლის წინ საკუთარი ძალების მოსინჯვა ბიზნესშიც გადაწყვიტა და 2024 წელს უალკოჰოლო ლუდის ბრენდი BERO დააარსა. ბრენდის შექმნის იდეა ჰოლანდის პირად გამოცდილებას უკავშირდება.
BERO-ს ისტორია 2022 წლის დასაწყისში დაიწყო, როდესაც ჰოლანდი Dry January-ს, ანუ ერთი თვით ალკოჰოლზე უარის თქმის გამოწვევას, შეუერთდა. თუმცა ერთთვიანი გადაწყვეტილება საბოლოოდ უფრო ხანგრძლივ პერიოდად იქცა და მსახიობმა ალკოჰოლზე უარის თქმა ცხოვრების წესად აქცია.
ამ გამოცდილებამ ჰოლანდს კიდევ ერთი პრობლემა დაანახვა – მისთვის სასურველი ხარისხის უალკოჰოლო ლუდის პოვნა მარტივი არ იყო. არსებული არჩევანი მის მოლოდინებს სრულად ვერ აკმაყოფილებდა და სწორედ აქედან გაჩნდა იდეა – შეექმნა ლუდი, რომელიც ალკოჰოლის გარეშე იქნებოდა, თუმცა გემოთი და ვიზუალური მხარით ჩვეულებრივ ლუდს არ ჩამოუვარდებოდა.
„ჩემთვის BERO პირადულია. ორწლიანი სიფხიზლის შემდეგ მინდოდა შემექმნა ისეთი რამ, რაც ჩემს ცხოვრების წესსა და ღირებულებებს ასახავდა“, – ამბობდა ჰოლანდი ბრენდის წარდგენისას. მისი თქმით, BERO მხოლოდ მათთვის არ შეიქმნა, ვინც ალკოჰოლზე უარი თქვა – მთავარი იყო, ადამიანებს არჩევანის შესაძლებლობა ჰქონოდათ და ხარისხიანი სასმლის მიღება ალკოჰოლის გარეშეც შეძლებოდათ.
BERO-ს შექმნის პროცესში ჰოლანდი მარტო არ ყოფილა. ბრენდის აღმასრულებელი დირექტორი ჯონ ჰერმანია, რომელსაც მომხმარებლების მიმართულებით მუშაობის მრავალწლიანი გამოცდილება აქვს. პროექტს ასევე შეუერთდნენ ინვესტორები და პარტნიორები, მათ შორის Imaginary Ventures და WME.
პროდუქტის საბოლოო სახის მისაღებად გუნდმა არაერთი რეცეპტი გამოსცადა. ჰოლანდისთვის განსაკუთრებით მნიშვნელოვანი იყო, რომ უალკოჰოლო სასმელს ლუდისთვის დამახასიათებელი გემო და ტექსტურა შეენარჩუნებინა.
ჰოლანდის პროექტი მოკლე დროში საკმაოდ დიდ ბიზნესად იქცა. BERO-ს პირველივე წლის გაყიდვებმა თითქმის 10 მილიონ დოლარს მიაღწია. 2026 წლისთვის კი კომპანია გაყიდვების დაახლოებით 30 მილიონ დოლარამდე გაზრდას ელოდებოდა.
ბრენდის გაფართოებაში მნიშვნელოვანი როლი ითამაშა საცალო ქსელებმაც. BERO თავდაპირველად ონლაინ გაიყიდა, შემდეგ კი Target-ის დაახლოებით 1200 მაღაზიაში გამოჩნდა.
2026 წელს მას ახალი მიმართულებაც დაემატა – უალკოჰოლო შანდის ხაზი, რომლის იდეა ჰოლანდის მეუღლეს, ზენდეიას, უკავშირდება. შანდი გამაგრილებელი დაბალალკოჰოლური სასმელია და ლუდისა და ლიმონათის ერთმანეთში შერევით მზადდება.
„სიმართლე გითხრათ, BERO Shandy Z-სთვის შევქმენი“, – თქვა ჰოლანდიმ ახალი ხაზის წარდგენისას.
ხაზში ოთხი განსხვავებული გემო შედის: Daybreak – ლიმონი და ლაიმი, Golden Hour – ვარდისფერი გრეიფრუტი, Sunset – ბაბუაწვერას ყვავილი და ლიმონი, ხოლო Midnight – მაყვალი და იუზუ.
მსახიობის თქმით, BERO-ს მთავარი მიზანი ადამიანების გაერთიანებაა – იქნება ეს მეგობრებთან შეხვედრა, სპორტული ღონისძიება თუ უბრალოდ საღამოს ერთად გატარება.
დღეს ტომ ჰოლანდის ბიზნესს უკვე რამდენიმე მილიონი დოლარის წლიური გაყიდვები, საერთაშორისო საცალო ქსელები, მსხვილი პარტნიორები და ახალი პროდუქტების ხაზი აქვს. იდეა კი, რომელიც მსახიობისთვის პირადი გამოცდილებიდან დაიწყო, უკვე დამოუკიდებელ ბრენდად ჩამოყალიბდა.
ასევე დაგაინტერესებთ:
#OK!BusinessCelebrity – პერის ჰილტონის მრავალმილიარდიანი ბიზნეს იმპერია
