სუპერმოდელი კაია გერბერი ძმის, პრესლი გერბერის გარდაცვალების შემდეგ მძიმე ემოციურ მდგომარეობაშია. გამოცემა Page Six-ის ინფორმაციით, ტრაგედიის შემდეგ მოდელი რამდენიმე კვირის განმავლობაში საზოგადოებისგან იზოლირებულია და მადა დაკარგული აქვს.
ოჯახთან დაახლოებული წყაროს ცნობით, კაიას საყვარელი ადამიანის დაკარგვასთან გამკლავება ძალიან უჭირს – დროის უმეტეს ნაწილს სახლში ატარებს, ახლობლები კი ცდილობენ, ამ რთულ პერიოდში გვერდით დაუდგნენ და ყოველდღიურ რუტინასთან დაბრუნებაში დაეხმარონ.
“კაიასთან ახლა მეგობრები რჩებიან. ყველანაირად ცდილობს, თავი ხელში აიყვანოს, თუმცა ბევრს არ ჭამს… მადაც არ აქვს. ამ ყველაფერს ისიც ართულებს, რომ წარსულში კვებითი აშლილობით იტანჯებოდა“, – ამბობს წყარო.
“მისთვის ძალიან რთულია იმის გაცნობიერება, რომ ძმას ვეღარასდროს ნახავს. ოჯახის ყველა წევრი მასზე ღელავს”.
პრესლი გერბერი 20 სექტემბერს კალიფორნიაში, სანტა მონიკაში მდებარე სარეაბილიტაციო დაწესებულებაში გარდაიცვალა. სამართალდამცავებმა შეტყობინება სავარაუდო ზედოზირებისა და გულის გაჩერების შესახებ დილით მიიღეს. ექსპერტიზა უკვე ჩატარდა, თუმცა ლოს-ანჯელესის ოლქის სამედიცინო ექსპერტიზის სამსახურს გარდაცვალების ოფიციალური მიზეზი ჯერ არ დაუსახელებია.
ასევე დაგაინტერესებთ:
#OK! სინდი კროუფორდის ერთადერთი ვაჟი, პრესლი გერბერი, 27 წლის ასაკში გარდაიცვალა
