სინდი კროუფორდისა და რენდი გერბერის ერთადერთი ვაჟის, 27 წლის პრესლი გერბერის გარდაცვალების შემდეგ მისი დამოკიდებულებასთან ბრძოლის შესახებ ახალი დეტალები ხდება ცნობილი. როგორც PEOPLE-ს წყარო უყვება, მოდელის მშობლები წლების განმავლობაში ცდილობდნენ შვილის დახმარებას და სხვადასხვა სახის მკურნალობას მიმართავდნენ.
PEOPLE-ის ინფორმაციით, სინდი კროუფორდი და რენდი გერბერი წლების განმავლობაში ეძებდნენ გზებს, რომლებიც პრესლის დამოკიდებულების დაძლევაში დაეხმარებოდა. ოჯახის ახლო წყაროს ცნობით, მან როგორც სტაციონარული თერაპია, ისე ამბულატორიული სარეაბილიტაციო პროგრამები გაიარა, ოჯახი კი სხვა, მათ შორის ჰომეოპათიურ მეთოდებსაც მიმართავდა. მშობლებმა ერთზე მეტი სიფხიზლის მწვრთნელიც, ე.წ. sober coach, დაიქირავეს.
„ოჯახი განადგურებულია“, – ამბობს წყარო PEOPLE-თან საუბრისას. მისივე თქმით, სინდი, რენდი ახლა საკუთარ თავს ეკითხებიან, კიდევ რისი გაკეთება შეეძლოთ შვილის დასახმარებლად.
პრესლის გარდაცვალების შემდეგ ყურადღების ცენტრში მოექცა ის სარეაბილიტაციო დაწესებულებაც, სადაც მან სიცოცხლის ბოლო საათები გაატარა.
როგორც TMZ და Page Six იუწყებიან, დაწესებულების მფლობელსა და დამფუძნებელს, დოქტორ რეზა ნაბავის, წარსულში ნარკოტიკებთან დაკავშირებული სამართლებრივი პრობლემები ჰქონდა.
გამოცემების ცნობით, ნაბავი 2002 წლის თებერვალში ოკლენდში დააკავეს. პოლიციამ ის ავტომობილში 15 წლის გოგონასთან ერთად იპოვა. მანქანის ჩხრეკისას სამართალდამცავებმა მეტამფეტამინი, მარიხუანა, იარაღი, საბრძოლო მასალა და სანადირო დანა აღმოაჩინეს.
პრესლი გერბერი 20 სექტემბერს კალიფორნიაში, სანტა მონიკაში მდებარე სარეაბილიტაციო დაწესებულებაში გარდაიცვალა. სამართალდამცავებმა შეტყობინება სავარაუდო ზედოზირებისა და გულის გაჩერების შესახებ დილით მიიღეს. ექსპერტიზა უკვე ჩატარდა, თუმცა ლოს-ანჯელესის ოლქის სამედიცინო ექსპერტიზის სამსახურს გარდაცვალების ოფიციალური მიზეზი ჯერ არ დაუსახელებია.
ასევე დაგაინტერესებთ:
#OK! სინდი კროუფორდის ერთადერთი ვაჟი, პრესლი გერბერი, 27 წლის ასაკში გარდაიცვალა
