სინდი კროუფორდისა და რიჩარდ გირის შვილები, კაია გერბერი და ჰომერ გირი, რაიან მერფის ახალ სერიალში „The Shards“ მონაწილეობენ.
სერიალის მოქმედება 1981 წლის ლოს-ანჯელესში ვითარდება და ელიტური კერძო სკოლის მოსწავლეების ცხოვრებას, მათ ურთიერთობებს, საიდუმლოებებსა და ქალაქში ახალგაზრდა ქალების მკვლელობების სერიას აერთიანებს. პროექტში მთავარ როლებს ასევე იგბი რიგნი და უეს ბენტლი ასრულებენ.
კაია გერბერი სერიალში ჭკვიანი და გავლენიანი მოსწავლის, სიუზან რეინოლდსის როლს ასრულებს. ჰომერ გირი კი რობერტ მალორის როლში გვევლინება – იდუმალი ახალი მოსწავლის, რომლის გამოჩენაც მთავარი პერსონაჟების ცხოვრებას მნიშვნელოვნად ცვლის.
აღსანიშნავია, რომ კაიას დედას, სუპერმოდელ სინდი კროუფორდს, და ჰომერის მამას, მსახიობ რიჩარდ გირს, წლების წინ რომანი ჰქონდათ. წყვილი 1991 წელს ლას-ვეგასში დაქორწინდა, თუმცა მათი ქორწინება ხანმოკლე აღმოჩნდა – 1995 წელს ისინი ერთმანეთს დაშორდნენ. კროუფორდმა მოგვიანებით ამ ურთიერთობას თავისი ცხოვრების „დიდი თავგადასავალი“ უწოდა და განმარტა, რომ ასაკობრივი სხვაობა და ის ფაქტი, რომ თავად ჯერ კიდევ საკუთარი თავის პოვნას ცდილობდა, მათი დაშორების ერთ-ერთი მიზეზი გახდა.
1992 წელს კროუფორდი და გირი Vogue-ის გარეკანზეც ერთად გამოჩნდნენ. სწორედ ამ ფოტოსესიას ეხმიანება Vogue-ის ახალი ნომერიც – ამჯერად გამოცემის გარეკანზე უკვე მათი შვილები, კაია გერბერი და ჰომერ გირი არიან. Vogue-მ 1992 წლის ისტორიული ფოტოსესიაც ხელახლა გამოაქვეყნა.
ყველაზე საინტერესო კი ის არის, რომ, მიუხედავად მათი მშობლების წარსულისა, კაია და ჰომერი ერთმანეთს აქამდე საერთოდ არ იცნობდნენ.
Vogue-სთვის მიცემულ ინტერვიუში ჰომერმა მათი პირველი შეხვედრა გაიხსენა. მისი თქმით, ისინი ლოს-ანჯელესში, ერთ-ერთ ბარში შეხვდნენ. გარკვეული პერიოდის შემდეგ ჰომერმა კაიას პირდაპირ ჰკითხა, იცოდა თუ არა, რომ მათი მშობლები ოდესღაც დაქორწინებულები იყვნენ. კაიას პასუხი კი მოკლე იყო – „კი. კარგი“.
ჰომერის თქმით, ამ თემაზე საუბარი მათ ურთიერთობაში უხერხულობას არ ქმნიდა და ერთმანეთთან დაახლოება ბუნებრივად მოხდა. დღეს ისინი მეგობრები არიან და „The Shards“-ში ერთად მუშაობის გამოცდილებას დადებითად აფასებენ.
ასევე დაგაინტერესებთ:
