სინდი კროუფორდისა და რენდი გერბერის ერთადერთი ვაჟი, პრესლი გერბერი, 27 წლის ასაკში გარდაიცვალა. ლოს-ანჯელესის ოლქის სასამართლო ექსპერტიზის ჩანაწერების მიხედვით, ის 20 სექტემბერს, რეაბილიტაციის ცენტრში დაიღუპა.
გარდაცვალების მიზეზი ამ დროისთვის უცნობია – აუტოფსია ჯერ დასრულებული არ არის.
ოჯახის წარმომადგენელმა განაცხადა, რომ ახლობლები ამ რთულ პერიოდში კონფიდენციალურობის დაცვას ითხოვენ.
ბოლო წლებში პრესლი საჯაროდ საუბრობდა დეპრესიაზე, ნარკოტიკების მოხმარებასა და გამოჯანმრთელების პროცესზე. სოციალურ ქსელში “ფსიქიკური ჯანმრთელობის ორშაბათების“ სახელით ვიდეოებსაც აქვეყნებდა და საკუთარ გამოცდილებას გამომწერებს უზიარებდა.
„ვფიქრობ, რომ გულწრფელობა საუკეთესო პოლიტიკაა“, – თქვა მან ერთ-ერთ ვიდეოში და პანიკური შეტევების სამართავად მიღებულ მედიკამენტებზე, მათ შორის ბენზოდიაზეპინებზე, ისაუბრა.
“კარგად უნდა იცოდე, რა უნდა მიიღო და როდის. თუ მედიკამენტებს არ იღებ, რაღაც ცუდი შეიძლება მოხდეს. მინდა, ექიმმა მკაფიოდ მითხრას: „ეს მიიღე დღეში სამჯერ“. მაგრამ ყველა ფსიქიატრი, ვისთანაც ვყოფილვარ – სულ 15 ექიმი – მეუბნებოდა: „აი, ეს 20 მედიკამენტი… შეგიძლია მაშინ მიიღო, როცა ამას საჭიროდ ჩათვლი. მე კი ასეთი თავისუფლება არ მაწყობს, მკაფიო მითითებები მჭირდება“.
ძმის ნარკოდამოკიდებულებასა და ფსიქიკური ჯანმრთელობის პრობლემებზე კაია გერბერმაც ისაუბრა:
„როდესაც ოჯახში ასეთი პრობლემა ჩნდება, ეს ყველასზე აისახება. ვფიქრობ, სწორედ ამიტომ დავიწყე საკუთარ თავზე ნაკლებად ფიქრი და როცა მიჭირდა, მშობლებს დახმარებას აღარ ვთხოვდი. სახლში უკვე იყო ერთი შვილი, ვისად დახმარება სჭირდებოდა” – ამბობდა კაია ინტერვიუში.
პრესლი გერბერი
პრესლი გერბერი 1999 წელს ბევერლი ჰილზში დაიბადა. სამოდელო კარიერა 15 წლის ასაკში დაიწყო, როდესაც IMG Models-თან კონტრაქტი გააფორმა. რამდენიმე წლის შემდეგ ის და მისი უმცროსი და, კაია გერბერი, მოდის ინდუსტრიის ყურადღების ცენტრში მოექცნენ.
გერბერმა პოდიუმზე პირველად Moschino-ს ჩვენებაზე გაიარა. მოგვიანებით Dolce & Gabbana-ს ჩვენებაში მონაწილეობდა და Calvin Klein-ის კამპანიაშიც გამოჩნდა. 2018 წელს განაცხადა, რომ კაიასთან ერთად მუშაობა მისთვის სამოდელო კარიერას “უფრო მარტივს და ნაკლებად მარტოსულს ხდიდა.”
ასევე დაგაინტერესებთ:
