კრის ჯენერი 71 წლის გახდა. ქალი, რომელმაც კარდაშიანების ოჯახი რეალითი შოუს გმირებიდან გლობალურ ბრენდად აქცია, უკვე წლებია შვილების კარიერას წარმატებით მართავს. თუმცა ამ წარმატებამდე იყო ავიაკომპანიაში მუშაობა, ბავშვობის პირველი სამსახური და ერთი იდეა, რომელმაც ოჯახის ცხოვრება სამუდამოდ შეცვალა.
- პირველი სამსახური 10 წლის ასაკში დაიწყო
კრისის ბიზნესინტერესს საფუძველი ჯერ კიდევ ბავშვობაში ჩაეყარა. დედასა და ბებიას კალიფორნიის ქალაქ ლა-ხოიაში სანთლების მაღაზიები ჰქონდათ და კრისიც ზაფხულობით მათთან მუშაობდა. თავდაპირველად საჩუქრებს ფუთავდა, შემდეგ საწყობში ეხმარებოდა, მოგვიანებით კი გაყიდვებშიც ჩაერთო. როგორც თავად იხსენებს, ამ გამოცდილებამ ასწავლა ორგანიზებულობა, მომხმარებლებთან ურთიერთობა და პასუხისმგებლობა. სწორედ ამ პერიოდს უკავშირებს იმ უნარების განვითარებას, რომლებიც მოგვიანებით შვილების კარიერის მართვაში დაეხმარა.
- კარიერა ბორტგამცილებლობით დაიწყო
სანამ მსოფლიო გაიცნობდა, კრისი American Airlines-ის ბორტგამცილებელი იყო. ამ პოზიციაზე დაახლოებით წელიწად-ნახევარი მუშაობდა. საინტერესოა, რომ სასურველ რეისებზე მოსახვედრად მან საკმაოდ უჩვეულო ხერხსაც მიმართა – ავიაკომპანიის განრიგის შედგენაზე პასუხისმგებელ თანამშრომლებს სახლში გამომცხვარი ბრაუნებით უმასპინძლდებოდა. საბოლოოდ, მოახერხა და სასურველ მარშრუტებზე შემცვლელ ბორტგამცილებლად მუშაობის შესაძლებლობა მიიღო.
- „Keeping Up With the Kardashians“ თავდაპირველად ოჯახის ბიზნესის პოპულარიზაციისთვის სურდა
2007 წელს, როდესაც კრის ჯენერი რეალითი შოუს იდეაზე მუშაობდა, მისი ერთ-ერთი მთავარი მიზანი ოჯახის ბიზნესის რეკლამირება იყო. იმ პერიოდში კარდაშიანებს კალაბასასში საკუთარი მაღაზიები ჰქონდათ. ჯენერის აზრით კი სატელევიზიო შოუ მათ საქმიანობას ფართო აუდიტორიას გააცნობდა.
- ტელევარსკვლავის კარიერა 51 წლის ასაკში დაიწყო
კრის ჯენერის სატელევიზიო კარიერა იმ ასაკში დაიწყო, როდესაც ბევრი ადამიანი პროფესიული ცხოვრების ახალ ეტაპზე გადასვლას უკვე აღარ გეგმავს. „Keeping Up With the Kardashians“-ის პრემიერის დროს ის 51 წლის იყო. Vogue-თან საუბრისას ჯენერმა აღიარა, რომ არასდროს წარმოედგინა, ამ ასაკში ასეთ მასშტაბურ კარიერას თუ დაიწყებდა.
- სიტყვა „Momager“ თავად შექმნა და სავაჭრო ნიშნად დაარეგისტრირა
კრის ჯენერის სახელს უკავშირდება სიტყვა „Momager“, რომელიც ინგლისური სიტყვების – „Mom“ (დედა) და „Manager“ (მენეჯერი) – გაერთიანებით შეიქმნა. ამ სახელით ის საკუთარ როლს აღწერს: დედა, რომელიც შვილების კარიერასაც მართავს. ჯენერმა ტერმინი სავაჭრო ნიშნად დაარეგისტრირა. დღეს ის ექვსივე შვილის საქმიანობაში მნიშვნელოვან როლს ასრულებს და ოჯახის ბიზნესპროექტების მართვაშიც მონაწილეობს.
ასევე დაგაინტერესებთ:
#OK! კრის ჯენერი ნერვიულობს, რომ კაილი ფულს ძალიან სწრაფად ხარჯავს
