ჯონ გალიანოსა და Zara-ს თანამშრომლობის პირველი კოლექცია უკვე ხელმისაწვდომია.
ცნობილი დიზაინერისა და ესპანური ბრენდის ორწლიანი თანამშრომლობის ფარგლებში შექმნილი პირველი კოლექცია Re{form} Zara Authored by the Couturier John Galliano 1 ოქტომბერს გამოვიდა.
კონცეფცია თავად გალიანოს ხედვას ეფუძნება და მისი მთავარი გზავნილია: „Authored by Couturier John Galliano. Built from our Memory, Made for Now“. დიზაინერმა Zara-ს არქივს გადაავლო თვალი და ბრენდის წარსულიდან შერჩეულ ელემენტები საკუთარი ხედვით წარმოგვიდგინა.
კოლექციაში შედის კაბები, პალტოები, პიჯაკები, შარვლები, ნაქსოვი სამოსი, თეთრეული და აქსესუარები. გალიანოს ხელწერა გამოკვეთილ სილუეტებში, უჩვეულო ფორმებსა და ისტორიული მოდის გავლენით შექმნილ დეტალებში იკითხება. კოლექციის ერთ-ერთი მთავარი შთაგონება საფრანგეთის რევოლუციის შემდგომი პერიოდის მოდაც გახდა.
სარეკლამო კამპანია ცნობილმა ფოტოგრაფმა სტივენ მეიზელმა გადაიღო. ნივთების ფასი 30 დოლარიდან იწყება და 1000 დოლარამდე აღწევს.
სიახლე განსაკუთრებით საინტერესოა დიზაინერის კარიერის გარშემო ბოლო პერიოდში განვითარებული მოვლენების ფონზე – გალიანო კვლავ საერთაშორისო მოდის ყურადღების ცენტრში აღმოჩნდა მას შემდეგ, რაც MET GALA-მ მისი კარიერისადმი მიძღვნილი გამოფენა გააუქმა.
გამოფენა ნიუ-იორკის Costume Institute-ში 2027 წლის გაზაფხულზე უნდა გახსნილიყო. პროექტის გაუქმების შესახებ მუზეუმმა და დიზაინერმა აგვისტოს ბოლოს ერთობლივად განაცხადეს.
ცნობისთვის, 2011 წელს ჯონ გალიანო Dior-ის კრეატიული დირექტორის პოზიციიდან გაათავისუფლეს მას შემდეგ, რაც პარიზის ერთ-ერთ ბარში ანტისემიტური და რასისტული განცხადებები გააკეთა. ინციდენტს სასამართლო პროცესი მოჰყვა და დიზაინერი რასისტული და ანტისემიტური შეურაცხყოფისთვის დამნაშავედ ცნეს. სკანდალის შემდეგ გალიანო გარკვეული პერიოდი მოდის ინდუსტრიას ჩამოშორდა, თუმცა მოგვიანებით კარიერა Maison Margiela-ში გააგრძელა.
ასევე დაგაინტერესებთ:
ჯონ გალიანოს „Met Gala-ს“ გამოფენა გაუქმდა – რა გახდა გადაწყვეტილების მიზეზი?
#OK! Galliano x Zara – ჯონ გალიანოსა და Zara-ს ახალი პროექტის გამოსვლის თარიღი ცნობილია
