ჯონ გალიანო მოდის ინდუსტრიაში ახალი პროექტით ბრუნდება – დიზაინერი Zara-სთან თანამშრომლობას აგრძელებს – „Re{form} Zara“ 1 ოქტომბერს გამოვა.
კონცეფცია თავად გალიანოს ხედვას ეფუძნება და მისი მთავარი გზავნილია: „Authored by Couturier John Galliano. Built from our Memory, Made for Now“. დიზაინერი Zara-ს არქივს გადაავლებს თვალს და ბრენდის წარსულიდან შერჩეულ ელემენტებს საკუთარი ხედვით წარმოგვიდგენს.
სიახლე განსაკუთრებით საინტერესოა დიზაინერის კარიერის გარშემო ბოლო პერიოდში განვითარებული მოვლენების ფონზე – გალიანო კვლავ საერთაშორისო მოდის ყურადღების ცენტრში აღმოჩნდა მას შემდეგ, რაც MET GALA-მ მისი კარიერისადმი მიძღვნილი გამოფენა გააუქმა.
გამოფენა ნიუ-იორკის Costume Institute-ში 2027 წლის გაზაფხულზე უნდა გახსნილიყო. პროექტის გაუქმების შესახებ მუზეუმმა და დიზაინერმა აგვისტოს ბოლოს ერთობლივად განაცხადეს. გადაწყვეტილებას წინ უძღოდა კრიტიკა, რომელიც გალიანოს 2011 წლის ანტისემიტურ და რასისტულ განცხადებებს უკავშირდება.
„უღრმესი მადლობა მეტროპოლიტენის ხელოვნების მუზეუმს, განსაკუთრებით კი მაქს ჰოლეინს, ენდრიუ ბოლტონსა და ანა ვინტურს. ჩემი შემოქმედებითი გზის განხილვამ იმ დაწესებულებაში, რომელსაც მთელი ცხოვრება ვაფასებდი, იმაზე მეტად აღმაფრთოვანა, ვიდრე ამის გადმოცემა შემიძლია.
ხანგრძლივი ფიქრისა და განხილვის შემდეგ, დიდი მწუხარებით გადავწყვიტე, რომ უმჯობესია, გამოფენა ამ დროისთვის არ ჩატარდეს.
სრულად ვარ პასუხისმგებელი წარსულში ჩემი სიტყვებით გამოწვეულ ტკივილზე, განსაკუთრებით იმ ტკივილზე, რომელიც ებრაულ და აზიურ თემებს მივაყენე, და ამის გამო ძალიან ვწუხვარ. მესმის, რომ ამას გამოფენით, ინსტიტუციური აღიარებით ან ერთი საჯარო ჟესტით ვერ გამოვისყიდი. ეს არის მუდმივი პასუხისმგებლობა, რომელიც ვლინდება მოსმენით, სწავლითა და ქცევით.
არ მინდა, რომ ჩემს გარშემო მიმდინარე დებატებმა მეტროპოლიტენის მუზეუმი რთულ მდგომარეობაში ჩააყენოს. ვაღიარებ და პატივს ვცემ იმ ფაქტს, რომ ჩემი ნამუშევრებისადმი მიძღვნილი გამოფენა ზოგიერთისთვის მტკივნეული იქნებოდა.
ასევე მინდა გამოვხატო ღრმა მადლიერება ყველას მიმართ, ვინც ამ თხუთმეტი წლის განმავლობაში ალკოჰოლიზმისა და დამოკიდებულებისგან გამოჯანმრთელების გზაზე მეხმარებოდა და გვერდით მედგა“ – ნათქვამი იყო გალიანოს განცხადებაში.
ცნობისთვის, 2011 წელს ჯონ გალიანო Dior-ის კრეატიული დირექტორის პოზიციიდან გაათავისუფლეს მას შემდეგ, რაც პარიზის ერთ-ერთ ბარში ანტისემიტური და რასისტული განცხადებები გააკეთა. ინციდენტს სასამართლო პროცესი მოჰყვა და დიზაინერი რასისტული და ანტისემიტური შეურაცხყოფისთვის დამნაშავედ ცნეს. სკანდალის შემდეგ გალიანო გარკვეული პერიოდი მოდის ინდუსტრიას ჩამოშორდა, თუმცა მოგვიანებით კარიერა Maison Margiela-ში გააგრძელა.
ასევე დაგაინტერესებთ:
ჯონ გალიანოს „Met Gala-ს“ გამოფენა გაუქმდა – რა გახდა გადაწყვეტილების მიზეზი?
