ნიუ-იორკის მეტროპოლიტენის მუზეუმის გადაწყვეტილებით, „Met Gala-ს“ გამოფენის თემა, რომელიც ჯონ გალიანოს კარიერას ეძღვნებოდა, გაუქმდა. გადაწყვეტილება მას შემდეგ მიიღეს, რაც Metropolitan Museum of Art-ის მიერ ცნობილი დიზაინერისთვის დაგეგმილ რეტროსპექტივას საზოგადოების, ებრაული თემის წარმომადგენლების, ნიუ-იორკელი პოლიტიკოსებისა და მუზეუმის დონორების მხრიდან მწვავე კრიტიკა მოჰყვა.
გალიანოს გამოფენა „John Galliano: Horizons“ 2027 წლის 3 მაისს უნდა გახსნილიყო. დაგეგმილმა ღონისძიებამ მალევე გამოიწვია უკმაყოფილება, განსაკუთრებით იმის გამო, რომ გახსნის თარიღი ჰოლოკოსტის ხსოვნის დღეს, იომ ჰაშოას, ემთხვეოდა. საბოლოოდ, თავად დიზაინერი და ნიუ-იორკის მეტროპოლიტენის მუზეუმი შეთანხმდნენ, რომ მისი კარიერისადმი მიძღვნილი გამოფენა აღარ გაიმართებოდა.
მომხდართან დაკავშირებით გალიანომ ვრცელი განცხადება გამოაქვეყნა:
„უღრმესი მადლობა მეტროპოლიტენის ხელოვნების მუზეუმს, განსაკუთრებით კი მაქს ჰოლეინს, ენდრიუ ბოლტონსა და ანა ვინტურს. ჩემი შემოქმედებითი გზის განხილვამ იმ დაწესებულებაში, რომელსაც მთელი ცხოვრება ვაფასებდი, იმაზე მეტად აღმაფრთოვანა, ვიდრე ამის გადმოცემა შემიძლია.
ხანგრძლივი ფიქრისა და განხილვის შემდეგ, დიდი მწუხარებით გადავწყვიტე, რომ უმჯობესია, გამოფენა ამ დროისთვის არ ჩატარდეს.
სრულად ვარ პასუხისმგებელი წარსულში ჩემი სიტყვებით გამოწვეულ ტკივილზე, განსაკუთრებით იმ ტკივილზე, რომელიც ებრაულ და აზიურ თემებს მივაყენე, და ამის გამო ძალიან ვწუხვარ. მესმის, რომ ამას გამოფენით, ინსტიტუციური აღიარებით ან ერთი საჯარო ჟესტით ვერ გამოვისყიდი. ეს არის მუდმივი პასუხისმგებლობა, რომელიც ვლინდება მოსმენით, სწავლითა და ქცევით.
არ მინდა, რომ ჩემს გარშემო მიმდინარე დებატებმა მეტროპოლიტენის მუზეუმი რთულ მდგომარეობაში ჩააყენოს. ვაღიარებ და პატივს ვცემ იმ ფაქტს, რომ ჩემი ნამუშევრებისადმი მიძღვნილი გამოფენა ზოგიერთისთვის მტკივნეული იქნებოდა.
ასევე მინდა გამოვხატო ღრმა მადლიერება ყველას მიმართ, ვინც ამ თხუთმეტი წლის განმავლობაში ალკოჰოლიზმისა და დამოკიდებულებისგან გამოჯანმრთელების გზაზე მეხმარებოდა და გვერდით მედგა“, – ნათქვამია დიზაინერის ვრცელ განცხადებაში.
ცნობისთვის, 2011 წელს გალიანო Dior-ის კრეატიული დირექტორის პოზიციიდან გაათავისუფლეს მას შემდეგ, რაც პარიზის ერთ-ერთ ბარში ანტისემიტური და რასისტული განცხადებები გააკეთა. ინციდენტს სასამართლო პროცესი მოჰყვა და დიზაინერი რასისტული და ანტისემიტური შეურაცხყოფისთვის დამნაშავედ ცნეს. სკანდალის შემდეგ გალიანო გარკვეული პერიოდი მოდის ინდუსტრიას ჩამოშორდა, თუმცა მოგვიანებით კარიერა Maison Margiela-ში გააგრძელა.
ასევე დაგაინტერესებთ:
#OK! ჯონ გალიანო X Zara – კოლაბორაცია, რომელსაც არავინ ელოდა
