ჯონ გალიანო – მოდის სამყაროს ,,გენიოსი“ 2 წლიანი პაუზის შემდეგ კვლავ ბრუნდება მოდაში. გალიანომ ორწლიანი თანამშრომლობა დაიწყო ესპანურ ბრენდ Zara-სთან, რომლის მიზანია ბრენდის არქივების „ხელახალი ავტორიზაცია“. დიზაინერი იმუშავებს Zara-ს წინა სეზონების ტანისამოსზე — ის მათ დაშლის და თავიდან ააწყობს, რის შედეგადაც შეიქმნება ახალი კოლექციები. აღნიშნული ხაზები წელიწადში ორჯერ გამოვა, ხოლო პირველი კოლექცია სექტემბერში იქნება წარმოდგენილი.
ეს არ იქნება კლასიკური გადამუშავება (recycling) ან upcycling – არც სრულად ნულიდან შექმნილი პროდუქტი. უფრო ზუსტად, ეს იქნება უკვე არსებული სამოსის თანამედროვე ინტერპრეტაცია, ყოველდღიური ტარებისთვის გადახალისებული და ხელახლა გააზრებული.
.
ეს პროექტი გალიანოს მოდაში დაბრუნებას აღნიშნავს Maison Margiela-დან 2024 წლის ბოლოს წასვლის შემდეგ, სადაც მან ათწლეული გაატარა. ამავდროულად, ეს მისი პირველი ნაბიჯია უფრო ხელმისაწვდომ სეგმენტში. სექტემბრის კოლექცია ასევე იქნება მისი პირველი ნამუშევარი 2024 წლის იანვარში გამართული გახმაურებული კოტურის შოუს შემდეგ, რომელიც პარიზის ხიდის ქვეშ მოწყობილი სცენოგრაფიით, ექსტრემალური კორსეტებითა და გამოკვეთილი რომანტიკული ესთეტიკით გამოირჩეოდა.
ამასთან, ეს არის პირველი შემთხვევა, როცა Zara ასეთ ხანგრძლივ თანამშრომლობას აფორმებს დიზაინერთან. მიუხედავად იმისა, რომ ბრენდს წარსულში ერთჯერადი კოლაბორაციები ჰქონია ისეთ დიზაინერებთან, როგორიც არიან Ludovic de Saint Sernin და Stefano Pilati (ყოფილი Saint Laurent-ის კრეატიული დირექტორი), მსგავსი ფორმატის პარტნიორობა მათთვის სიახლეა.
გალიანოს მომავალთან დაკავშირებით სპეკულაცია მას შემდეგ არ წყდებოდა, რაც მან Maison Margiela დატოვა — მისი სახელი არაერთ კრეატიული დირექტორის პოზიციას უკავშირდებოდა, თუმცა მასობრივი ბაზრისკენ გადახრას თითქმის არავინ ელოდა. სწორედ ამ მოულოდნელი ნაბიჯის ფონზე, მოდის ინდუსტრიაში კვლავ გააქტიურდა მისი კარიერისა და გავლენის გადაფასების პროცესი.
გალიანო, რომელიც ყოველთვის ისეთივე გამორჩეული და წინააღმდეგობრივი ფიგურა იყო, როგორსაც თავად ქმნიდა, 2011 წელს სკანდალის შემდეგ ინდუსტრიიდან გარიყეს. პარიზის ბარში გაკეთებული ანტისემიტური განცხადებების გამო ის Dior-დან გაათავისუფლეს და სიძულვილის ნიადაგზე ჩადენილ დანაშაულშიც დამნაშავედ ცნეს. თუმცა, რეაბილიტაციის კურსის გავლის, საჯარო ბოდიშებისა და Maison Margiela-ში წარმატებული ათწლეულის შემდეგ, დიზაინერი თანდათანობით კვლავ მიიღეს როგორც მოდის სამყარომ, ისე სელებრითებმა.
