ჰარი პოტერის ჯადოსნური სამყარო ახალ ისტორიებს გვთავაზობს – გამომცემლობა Bloomsbury 2027 წლის თებერვალში ორ ახალ ილუსტრირებულ წიგნს გამოსცემს, რომელთა მთავარი გმირები ჰოგვორტსის გამორჩეული პროფესორი მინერვა მაკგონაგელი და ჯადოსნური სამყაროს ყველაზე ცნობილი ოინბაზები, ფრედ და ჯორჯ უიზლები, იქნებიან.
ახალი წიგნები Harry Potter-ის სამყაროს შესახებ დამატებით დეტალებს გააცნობს მკითხველს. Pocket Potters მცირე ილუსტრირებული გზამკვლევების სერიაა, რომელიც წიგნების ცნობილ პერსონაჟებს, დასამახსოვრებელ ეპიზოდებსა და ჯადოსნური სამყაროს საინტერესო დეტალებს აერთიანებს. გამოცემები განსაკუთრებით ახალგაზრდა მკითხველებისთვისაა განკუთვნილი, თუმცა მათში საყვარელი პერსონაჟების შესახებ ახალი დეტალების აღმოჩენა ჰარი პოტერის დიდი ხნის გულშემატკივრებსაც შეეძლებათ.
ერთ-ერთი წიგნი პროფესორ მინერვა მაკგონაგელს დაეთმობა – ჰოგვორტსის ტრანსფიგურაციის მასწავლებელს, გრიფინდორის სახლის ხელმძღვანელსა და ერთ-ერთ ყველაზე გამორჩეულ ჯადოქარს. გამოცემა მის ჯადოსნურ შესაძლებლობებს, ჰოგვორტსში საქმიანობასა და ჰარი პოტერთან ურთიერთობას გააცოცხლებს. ილუსტრაციებზე ნატალი სმილი იმუშავებს.
მეორე წიგნის მთავარი გმირები კი ფრედ და ჯორჯ უიზლები იქნებიან – ჰარი პოტერის სამყაროს ერთ-ერთი ყველაზე მხიარული და დაუვიწყარი დუეტი. გამოცემა მათ ჰოგვორტსში მოწყობილ ოინებსა და ჯადოსნური ხუმრობების გამოგონებას დაეთმობა. წიგნის ილუსტრატორი ჰელენ ბრეიდია.
აღსანიშნავია, რომ ეს ჰარი პოტერის ორიგინალური სერიის გაგრძელება არ არის – ორივე გამოცემა პერსონაჟების შესახებ ილუსტრირებული გზამკვლევების სერიის ნაწილია. Pocket Potters 2025 წელს, ჰარის, რონისა და ჰერმიონისადმი მიძღვნილი წიგნებით დაიწყო, მოგვიანებით კი კოლექციას სხვა ცნობილი პერსონაჟების გამოცემებიც დაემატა.
ასევე დაგაინტერესებთ:
#OK! ჰარი პოტერი ეკრანს უბრუნდება – HBO-მ სერიალის ახალი თრეილერი გამოაქვეყნა
#OK! ჰარი პოტერის ვარსკვლავები ადრე და ახლა – როგორ შეიცვალა მათი ცხოვრება “ჰოგვორტსის” შემდეგ
