ჰარი პოტერის ჯადოსნური სამყარო ეკრანებზე ბრუნდება – HBO-მ მომავალი სერიალის ახალი, ბევრად უფრო დეტალური თრეილერი გამოაქვეყნა. ვიდეოში მაყურებელი პირველად ხედავს ჰოგვორტსის ყოველდღიურ ცხოვრებას, ჰარისა და მისი მეგობრების პირველ ნაბიჯებს ჯადოქრების სამყაროში, ქვიდიჩის მატჩს და იმ საკულტო სცენებს, რომლებიც ჯ.კ. როულინგის წიგნიდან მილიონობით ადამიანს ახსოვს.
ახალი სერიალი „ჰარი პოტერის“ სამყაროს ხელახლა გაგვაცნობს და HBO-ს ერთ-ერთ ყველაზე მასშტაბურ სატელევიზიო პროექტად ითვლება. ფილმებისგან განსხვავებით, სიუჟეტი შვიდ სეზონად განვითარდება – თითო სეზონი ჯ.კ. როულინგის ერთ წიგნს დაეთმობა. ეს ფორმატი შემქმნელებს საშუალებას მისცემს, ეკრანზე გადაიტანონ ის მნიშვნელოვანი დეტალები, პერსონაჟები და სიუჟეტური ხაზები, რომლებიც ფილმებში შეზღუდული ქრონომეტრაჟის გამო გამოტოვებული იყო.
დომინიკ მაკლაფლინი ჰარი პოტერის როლს შეასრულებს. ახალგაზრდა მსახიობისთვის ეს პირველი მასშტაბური პროექტია. ალასტერ სტაუტი რონ უიზლის როლს განასახიერებს, ხოლო არაბელა სტენტონი – ჰერმაიონ გრეინჯერის.
ახალ სერიალში მაყურებელი „ჰარი პოტერის“ სამყაროსთვის კარგად ნაცნობ პერსონაჟებს სრულიად ახალი მსახიობების შესრულებით იხილავს. ალბუს დამბლდორის როლს ჯონ ლითგოუ განასახიერებს, პროფესორ მინერვა მაკგონაგელის როლში ჯანეტ მაკტირი გამოჩნდება, სევერუს სნეიპს პააპა ესიედუ ითამაშებს, ჰაგრიდს კი – ნიკ ფროსტი. სერიალის ქასთს ასევე შეუერთდნენ ლუკ თალონი პროფესორ ქუირელის, ხოლო პოლ უაითჰაუსი არგუს ფილჩის როლში.
სერიალში ასევე მონაწილეობენ:
- ლოქს პრატი — დრაკო მალფოი;
- ჯონი ფლინი — ლუციუს მალფოი;
- ბელ პაუელი — პეტუნია დერსლი;
- დენიელ რიგბი — ვერნონ დერსლი;
- ამოს კიტსონი — დადლი დერსლი;
- კეტრინ პარკინსონი — მოლი უიზლი;
ახალი სერიალის ქასთინგში ყველაზე მეტი განხილვა პააპა ესიედუს სევერუს სნეიპის როლზე დამტკიცებას მოჰყვა. სნეიპი ჯ.კ. როულინგის წიგნებში აღწერილია როგორც ფერმკრთალი, გამხდარი, შავგვრემანი მამაკაცი, ხოლო ფილმებში პერსონაჟს ალან რიკმანი განასახიერებდა. ამის გამო, მაყურებლების ნაწილი მიიჩნევდა, რომ ახალი ქასთინგი წიგნის აღწერას არ შეესაბამებოდა.
სერიალის აღმასრულებელ პროდიუსერებს შორის არიან თავად ჯ.კ. როულინგი, ნილ ბლერი, რუთ კენლი-ლეტსი და დევიდ ჰეიმანი.
განსაკუთრებით საინტერესოა მუსიკალური მხარეც – ახალი სერიალისთვის ახალი მუსიკის შექმნაზე ჰანს ციმერი და „Bleeding Fingers Music“ მუშაობენ.
პირველი სეზონი 8 ეპიზოდისგან შედგება და მისი ოფიციალური სახელწოდებაა „Harry Potter and the Philosopher’s Stone“ – „ჰარი პოტერი და ფილოსოფიური ქვა“.
გეგმა გაცილებით მასშტაბურია: შვიდი სეზონი შვიდივე წიგნს უნდა დაეთმოს. შესაბამისად, თუ პროექტი თავდაპირველი გეგმით გაგრძელდა, მაყურებელი მომავალ სეზონებში იხილავს „საიდუმლო ოთახს“, „აზკაბანის ტყვეს“, „ცეცხლოვან თასს“, „ფენიქსის ორდენს“, „ნახევარპრინცს“ და საბოლოოდ „სიკვდილის საჩუქრებს“.
სერიალის პრემიერა 2026 წლის 25 დეკემბერს, შობის დღეს, შედგება.
ასევე დაგაინტერესებთ:
#OK! ჰარი პოტერის ვარსკვლავები ადრე და ახლა – როგორ შეიცვალა მათი ცხოვრება “ჰოგვორტსის” შემდეგ
