რუპერტ გრინტი რონ უისლის როლს უბრუნდება – გავრცელებული ინფორმაციით, იგი სპექტაკლის, „ჰარი პოტერი და დაწყევლილი ბავშვი“, მსახიობთა შემადგენლობას შეუერთდება და რონ უისლის ზრდასრულ ვერსიას განასახიერებს.
გრინტის 17-კვირიანი გამოსვლები ნიუ-იორკში, Lyric Theatre-ში, 2027 წლის 2 თებერვალს დაიწყება და 30 მაისამდე გაგრძელდება.
სპექტაკლში მოქმედება „ჰარი პოტერის“ მთავარი მოვლენებიდან 19 წლის შემდეგ ვითარდება. სიუჟეტის მთავარი ხაზი ჰარის ვაჟის, ალბუს სევერუს პოტერისა და დრაკო მალფოის შვილის, სკორპიუს მალფოის გარშემო ვითარდება.
„ჰარი პოტერი და დაწყევლილი ბავშვი“ ბროდვეის ერთ-ერთ ყველაზე წარმატებულ დადგმად ითვლება. სპექტაკლმა მსოფლიოში 14 მილიონზე მეტი ბილეთი გაყიდა, შემოსავალმა კი 532 მილიონ დოლარს გადააჭარბა, რაც მას ბროდვეის ისტორიაში ყველაზე შემოსავლიან არამიუზიკლურ სპექტაკლად აქცევს. დადგმას ასევე მიღებული აქვს ექვსი Tony Award, მათ შორის – საუკეთესო პიესის კატეგორიაში.
„რონ უისლი 11 წლიდან ჩემი ცხოვრების ნაწილია. მოუთმენლად ველოდები მასთან შეხვედრას ცხოვრების ამ ეტაპზე“, – განაცხადა მსახიობმა.
აღსანიშნავია, რომ მანამდე „ჰარი პოტერის“ სამყაროს ტომ ფელტონიც დაუბრუნდა — მსახიობმა „დაწყევლილ ბავშვში“ ზრდასრული დრაკო მალფოი განასახიერა. თუმცა მათ დუეტს მაყურებელი ვერ იხილავს – ფელტონის გამოსვლები 2027 წლის 3 იანვარს დასრულდება, გრინტის კი ერთი თვის შემდეგ, 2 თებერვალს, დაიწყება.
ასევე დაგაინტერესებთ:
#OK! ჰარი პოტერის ვარსკვლავები ადრე და ახლა – როგორ შეიცვალა მათი ცხოვრება “ჰოგვორტსის” შემდეგ
#OK! ,,ჰარი პოტერი” ბრუნდება – გაიცანით ჰოგვარტსის ახალი გმირები
