სუპერმოდელმა ანოკ იაიმ ჯანმრთელობის მდგომარეობის შესახებ საჯაროდ ისაუბრა და გაამხილა, რომ იშვიათი თანდაყოლილი დეფექტის გამო მისი ფილტვები თანდათან ზიანდებოდა.
მოდელს დაავადების ზუსტი სამედიცინო დასახელება საჯაროდ არ გაუმხელია. თუმცა, როგორც აღნიშნავს, თავდაპირველად სიმპტომებს ყურადღებას არ აქცევდა და პროფესიულ საქმიანობას ჩვეულ რეჟიმში აგრძელებდა. მოგვიანებით კი გაირკვა, რომ მდგომარეობა გადაუდებელ მკურნალობას საჭიროებდა.
იაიმ დიაგნოზისა და რთული გამოჯანმრთელების შესახებ People-თან და British Vogue-თან ისაუბრა. მისი თქმით, ჯანმრთელობის პრობლემა თითქმის მთელი ცხოვრების განმავლობაში უსიმპტომოდ მიმდინარეობდა, თუმცა დროთა განმავლობაში მდგომარეობა გაუარესდა. 2025 წლის დეკემბერში მოდელს ფილტვებზე ოპერაცია ჩაუტარდა, 2026 წლის იანვარში კი გართულებების გამო საავადმყოფოში ხელახლა გადაიყვანეს.
„მახსოვს, ექიმმა რომ გამაღვიძა და მითხრა: „ღმერთო ჩემო, ეს ძალიან რთული იყო. კინაღამ დაგკარგეთ. კინაღამ მოკვდი“. სწორედ მაშინ გავიაზრე, რამდენად მძიმე იყო ყველაფერი“, – აღნიშნა მოდელმა.
„მახსოვს ჩემი ოჯახის წევრების სახეები და ის, თუ როგორ დუმდნენ. ვფიქრობდი: ახლა რომ მოვკვდე, ხვალ დილით ყველა მაინც გაიღვიძებს, მზე ამოვა და ცხოვრება გაგრძელდება. არასდროს მიგრძნია თავი ერთდროულად ასე მნიშვნელოვან და უმნიშვნელო ადამიანად“.
2026 წლის თებერვალში Dazed-თან საუბრისას იაიმ აღნიშნა, რომ ჯანმრთელობის პრობლემებმა საკუთარი სხეულის მიმართ დამოკიდებულება შეუცვალა.
„ბოლო პერიოდის შემდეგ ნამდვილად ვისწავლე ჩემი სხეულის მოსმენა. სხეული ყოველთვის გაძლევს სიგნალებს და რაღაცებს განიშნებს, მე კი მათი უგულებელყოფა შევწყვიტე“, – განაცხადა მან.
მიუხედავად რთული გამოცდილებისა, მოდელი პოდიუმს დაუბრუნდა. ოპერაციის შემდეგ Chanel-ის 2026 წლის შემოდგომა-ზამთრის ჩვენებაზე გამოჩნდა – აღიარა, რომ გრძელი პოდიუმის გავლა აბრკოლებდა და ეშინოდა, შუა გზაში ცუდად არ გამხდარიყო, თუმცა ჩვენება წარმატებით დაასრულა.
ასევე დაგაინტერესებთ:
#OK! როგორ შეცვალა ერთმა ფოტომ მთელი ცხოვრება – ანოკ იაის წარმატების საიდუმლო
