აფრიკული წარმოშობის ამერიკელი მოდელი, ანოკ იაი დღეს მოდის ინდუსტრიაში ერთ-ერთი ყველაზე მოთხოვნადი სახეა. ბოლო 8 წლის განმავლობაში მან მოდის სამყაროს მწვერვალები დაიპყრო და ნაომი კემპბელის შემდეგ მეორე შავკანიანი მოდელი გახდა, რომელმაც Prada-ს ჩვენება გახსნა. 28 წლის ანოკი ისეთი ბრენდების სახე გახდა, როგორიცაა Louis Vuitton და Mugler, ასევე მონაწილეობდა Chanel-ის, Saint Laurent-ისა და Estée Lauder-ის სარეკლამო კამპანიებში. მაინც რაში მდგომარეობს ანოკ იაის წარმატების საიდუმლო?
ანოკ იაი კაიროში, სამხრეთ სუდანელი ემიგრანტების ოჯახში 1997 წელს დაიბადა. სამი წლის ასაკში მისი ოჯახი საცხოვრებლად აშშ-ში გადავიდა და ნიუ-ჰემფშირში დასახლდა.
“ჩემი მშობლები ამერიკაში დღეში 16 საათის განმავლობაში მუშაობდნენ, რომ ჩვენზე ეზრუნათ. ღარიბები ვიყავით. გარკვეული დროის განმავლობაში, საერთო საცხოვრებელში ვცხოვრობდით, შემდეგ კი ჩვენი სახლიც ვიყიდეთ.” – იხსენებს ანოკი.
მომავალ მოდელს დედა ბავშვობიდან ღირსების გრძნობას და საკუთარი თავის რწმენას უნერგავდა. სწორედ დედამ ასწავლა, რომ საკუთარი მომხიბვლელობა თვითონვე უნდა ემართა და სხვების აზრზე დამოკიდებული არ უნდა ყოფილიყო. ჭკვიანი ქალი ამას ისეთი ოსტატობით აკეთებდა, რომ ანოკი ხშირად ვერ აცნობიერებდა, თავდაჯერება როგორ უყალიბდებოდა.
ანოკი 2017 წლის ოქტომბერში პროფესიონალმა ფოტოგრაფმა შენიშნა და ფოტოს გადაღება სთხოვა. ფოტოს, რომელიც ავტორმა ინსტაგრამზე გამოაქვეყნა, იმდენად დიდი გამოხმაურება მოჰყვა, რომ გოგონას “Next Model Management”-თან თანამშრომლობა შესთავაზეს.
მალე გოგონა ისეთი ბრენდების შოუებში გამოჩნდა, როგორებიცაა Hermès, Versace, Chanel და Tom Ford. ანოკი იაი მუდმივად პრესტიჟული ჟურნალების გარეკანებზე გვხვდება, სხვადასხვა ბრენდის ჩვენებაზე გამოდის და სოციალურ ღონისძიებებს ესწრება. ბრიტანეთის მოდის საბჭომ ის 2025 წლის მოდელად დაასახელა. მისი ცხოვრება იმის მაგალითად იქცა, როგორ შეიძლება ერთმა ფოტომ შეცვალოს ადამიანის ცხოვრება.
პოპულარული მოდელი ხელოვნების დიდი თაყვანიმცემელია. მუზეუმებში ის ცნობილი მხატვრების ტილოების წინ საათობით დგას, სახლში კი თავად ხატავს. რამდენიმე წლის წინ მან ფერწერა შეისწავლა და თავისუფალ დროს საყვარელ საქმეს უთმობს. ბოლო ინტერვიუში მოდელმა აღნიშნა, რომ საკუთარ პორტრეტზე დაიწყო მუშაობა და მას ყოველთვიურად ახალ დეტალებს ამატებს. თავად ანოკი ამ ნამუშევარს „დროის კაფსულას“ უწოდებს.
„როდესაც წარმატებას ვაღწევ, მთელი სამყარო იხსნება და უდიდეს აღტაცებას ვგრძნობ. ჩემი წარმოდგენა სილამაზეზე საკუთარი ღირებულების შეგრძნებიდან მოდის“ – ამბობს მოდელი.
კითხვაზე, თუ რას ფიქრობს დასავლურ კულტურაში დამკვიდრებულ აზრზე, რომ დაბერება სილამაზის დაკარგვას ნიშნავს, ანოკმა აუღელვებლად უპასუხა: „მე ფერადკანიანი ვარ, მსგავსი აზრი თავში არასდროს მომსვლია. ვფიქრობ, ეს რაღაც შენსა და ღმერთს შორისაა“.
ანოკი ყოველთვის და ყველგან ხატავს. ზოგჯერ, როდესაც გადაღებების მოლოდინში სასტუმროს ნომერში დიდი დროის გატარება უწევს, შეუძლია ბალიშისპირები და ტანსაცმელიც კი მოხატოს. ასეთ დროს ლოდინი მისთვის არა დამქანცველი, არამედ სასიამოვნო პროცესია. მუშაობისთვის კი კარგი განწყობა უმნიშვნელოვანესია.
2023 წელს, როდესაც მისი კარიერა მწვერვალზე იყო, ანოკმა დასვენება გადაწყვიტა და მხატვარ კეჰინდე უაილის შემოქმედებით სივრცეში სტაჟირება გაიარა.
„ერთი თვით ჩავეწერე და ტელეფონიც კი გამოვრთე“, – ამბობს მოდელი.
ანოკის, როგორც სუპერმოდელის უჩვეულო გზა მოდელობაზე მეოცნებე გოგონებისთვის იდეალური მაგალითია. ის მსოფლიოს გარშემო მოგზაურობს, სხვადასხვა კულტურას ეცნობა და შთაგონებას დედამიწის ყოველი კუთხიდან იღებს.
ცივ ნიუ-ჰემფშირშიც კი, დედა ანოკს სასიამოვნო შინაური რიტუალებით ანებივრებდა.
„ჩვენს კულტურაში, ძალიან ვუფრთხილდებით კანს და სახლის არომატებს“ – ამბობს ანოკი.
მოდელს ყველაზე მეტად ლავანდისა და ვარდის ზეთების სურნელი მოსწონს. ის ხშირად ანთებს არომატულ სანთლებს, კითხულობს ან მედიტირებს, რაც გონების გაწმენდაში და ყოველდღიური ქაოსისგან დასვენებაში ეხმარება.
ასევე დაგაინტერესებთ
