„Victoria’s Secret“-ის ყოფილი ანგელოზი რომი სტრეიდი 2026 წლის შოუში მონაწილეობას ვერ მიიღებს. 31 წლის ნიდერლანდელმა მოდელმა სოციალურ ქსელში გამოქვეყნებულ ვიდეოებში თავად ისაუბრა უარის მიზეზსა და კასტინგის პროცესზე, რომელიც მისთვის განსაკუთრებით სტრესული აღმოჩნდა.
რომი სტრეიდი „Victoria’s Secret“-ის შოუზე 2014-დან 2018 წლამდე გამოდიოდა. წელს კი, ორი შვილის გაჩენის შემდეგ, პოდიუმზე დაბრუნება გადაწყვიტა. ამისთვის ზაფხულის განმავლობაში ვარჯიშობდა, სექტემბერში კი ნიუ-იორკში კასტინგზეც ჩავიდა.
მოდელის თქმით, თავდაპირველად ფიქრობდა, რომ პასუხს მალევე მიიღებდა, თუმცა რამდენიმე კვირის განმავლობაში არაფერი სმენია.
„გონებრივად ეს ჩემთვის ერთგვარი ემოციური ატრაქციონი იყო, რადგან ვარჯიში უნდა გამეგრძელებინა, თუმცა არ ვიცოდი, მონაწილეობას მივიღებდი თუ არა. ორი შვილისა და ჩემი ამჟამინდელი ცხოვრების გათვალისწინებით, მოსამზადებლად დროის გამონახვა უფრო რთულია. ამ ყველაფერს ბევრი დრო და ენერგია დავუთმე“, – ამბობს მოდელი.
მოგვიანებით რომიმ სოციალურ ქსელში კიდევ ერთი ვიდეო გამოაქვეყნა და დაადასტურა, რომ შოუში მონაწილეობაზე უარი მიიღო. მისი თქმით, სააგენტოსგან განმარტება მოითხოვა, თუმცა პასუხმა კიდევ უფრო გაურკვეველ მდგომარეობაში ჩააგდო.
„უარი მივიღე და ეს ნორმალურია, რადგან უარი მოდელების პროფესიული ცხოვრების ნაწილია. პრობლემა ის არის, რომ სააგენტოსთან საუბრისას ვცადე გამერკვია, რატომ არ ამირჩიეს, თუმცა მითხრეს, რომ მათი აზრით, წელს შოუს არ მოვერგებოდი“, – ამბობს სტრეიდი.
„განცდა მაქვს, რომ სიმართლეს ბოლომდე არ მეუბნებიან. უბრალოდ გულწრფელები იყავით ჩემთან, ყველაფერი პირდაპირ მითხარით და მეც შევძლებ, გავაგრძელო ცხოვრება და ამ ამბავს შევეგუო. ამდენ ხანს გაურკვევლობაში ყოფნამ დიდი ემოციური სტრესი მომიტანა“.
სტრეიდი ამბობს, რომ ამ გამოცდილების შემდეგ „Victoria’s Secret“-ის კასტინგში მონაწილეობას, სავარაუდოდ, აღარ მიიღებს. სურს, ბრენდთან დაკავშირებული დადებითი მოგონებები შეინარჩუნოს და უსიამოვნო გამოცდილებას წარსული წარმატებების გადაფარვის უფლება არ მისცეს.
Victoria’s Secret Fashion Show 2026 წელს 18 ოქტომბერს გაიმართება. ღონისძიება ლოს-ანჯელესში ჩატარდება და, ტრადიციულად, მოდას, მუსიკასა და გრანდიოზულ სანახაობას გააერთიანებეს.
შოუს მაყურებელი პირდაპირ ეთერში Victoria’s Secret-ის ოფიციალურ YouTube-არხზე, ასევე ბრენდის Instagram-სა და TikTok-ზე იხილავს. პირდაპირი ტრანსლაცია ლოს-ანჯელესის დროით 16:30 საათზე, ნიუ-იორკის დროით კი 19:30-ზე დაიწყება.
წლევანდელი ღონისძიების მუსიკალური ნაწილი უკვე ცნობილია: პოდიუმზე ცოცხალი შესრულებებით KATSEYE, Megan Moroney, Megan Thee Stallion და Tate McRae წარდგებიან.
2026 წლის ღონისძიებაში მონაწილეობას არაერთი ცნობილი მოდელი მიიღებს. ოფიციალურად დადასტურებულ მონაწილეებს შორის არიან ადრიანა ლიმა, ჯიჯი ჰადიდი, ალექს კონსანი, პალომა ელსესერი, ანოკ იაი, ეშლი გრემი, კენდის სვეინპოლი, ები ჩემპიონი, იმან ჰამამი და დევინ გარსია.
