ანა ვინტუი – ქალი, რომლის სახელი ათწლეულების განმავლობაში მოდის ინდუსტრიის გავლენასთან, მკაცრ ხასიათთან, გამორჩეულ სტილთან და ცნობილ მზის სათვალეებთან ასოცირდება, დღეს 77 წლის გახდა.
- გზა ლონდონის მოდის მაღაზიებიდან ერთ-ერთი ყველაზე გავლენიანი მოდური გამოცემის სათავემდე საკმაოდ საინტერესო და წინააღმდეგობებით სავსე აღმოჩნდა.
ანა ვინტური 1949 წლის 3 ნოემბერს, ლონდონში დაიბადა. ის ჟურნალისტ ჩარლზ ვინტურისა და ამერიკელი ელინორ ტრეგო ბეიკერის შვილია. მამამისი გავლენიანი ბრიტანული გაზეთის, Evening Standard-ის რედაქტორი იყო, დედა კი ფილანტროპიულ საქმიანობას ეწეოდა. ჟურნალისტიკა მისთვის უცხო გარემო არ ყოფილა – ოჯახში მედიისა და საზოგადოებრივი ცხოვრების მიმართ ინტერესი ყოველთვის არსებობდა.
ცოტამ თუ იცის, რომ მამამ ჯერ კიდევ სკოლის პერიოდში ურჩია, Vogue-ის რედაქტორი გამხდარიყო.
მოდით მოზარდობის ასაკიდანვე დაინტერესდა. ხშირად არღვევდა სკოლის დრესკოდს და საკუთარ სტილს ქმნიდა. განსაკუთრებული ინტერესი ამერიკული ჟურნალის, Seventeen-ის მიმართ ჰქონდა, რომელსაც ბებია ყოველთვიურად უგზავნიდა.
საყურადღებოა მისი გარეგნობის ერთი დეტალიც: ცნობილი მოკლე ვარცხნილობა, რომელიც წლების განმავლობაში მისი იმიჯის განუყოფელ ნაწილად იქცა, ჯერ კიდევ მოზარდობისას შეარჩია და აღარასდროს შეუცვლია.
სანამ მოდის ჟურნალისტიკაში აღმოჩნდებოდა, ვინტური ლონდონის ცნობილ მაღაზია Biba-ში მუშაობდა. ეს იყო 1960-იანი წლების ერთ-ერთი ყველაზე პოპულარული მოდური სივრცე, რომელიც ახალგაზრდული კულტურის მნიშვნელოვან ნაწილად იქცა. მოგვიანებით Harrods-შიც მუშაობდა, თუმცა აკადემიური განათლების გაგრძელება არ ისურვა და პროფესიული კარიერის დაწყება გადაწყვიტა.
კარიერის დასაწყისში სამსახურიდან გაათავისუფლეს – დღეს რთული წარმოსადგენია, რომ ადამიანი, რომელიც მოგვიანებით Vogue-ის მთავარი რედაქტორი გახდა, ოდესღაც სამსახურიდან გაათავისუფლეს. 1975 წელს ნიუ-იორკში გადასვლის შემდეგ ვინტური Harper’s Bazaar-ში უმცროსი მოდის რედაქტორი გახდა, თუმცა იქ მხოლოდ ცხრა თვე იმუშავა. მისი არატრადიციული იდეები რედაქციის მოლოდინებს არ ემთხვეოდა.
1988 წლის ნოემბერში ანა ვინტურის ხელმძღვანელობით გამოცემული პირველი Vogue-ის გარეკანი იმ დროისთვის ნამდვილ სიახლეს წარმოადგენდა. მოდელი მიქაელა ბერჩუ დიზაინერულ სამოსთან ერთად ჯინსებში იყო გამოწყობილი. მანამდე ჟურნალის გარეკანებზე გაცილებით ფორმალური და მდიდრული სტილი დომინირებდა. ახალი კონცეფცია იმდენად უჩვეულო აღმოჩნდა, რომ სტამბიდან რედაქციას დაუკავშირდნენ და იკითხეს, ხომ არ იყო გარეკანი შეცდომით დაბეჭდილი.
ანა ვინტური 1995 წლიდან Met Gala-ს თანათავმჯდომარეა. მისი ხელმძღვანელობით მუზეუმის საქველმოქმედო ღონისძიება მსოფლიოს ერთ-ერთ ყველაზე მნიშვნელოვან მოდურ მოვლენად იქცა. სწორედ მის სახელს უკავშირდება ცნობილი ადამიანების, დიზაინერებისა და ხელოვანების გაერთიანება ერთ სივრცეში.
მიუხედავად იმისა, რომ მისი სახელი ძირითადად მოდის სამყაროს უკავშირდება, ანა ვინტური ჩოგბურთის დიდი გულშემატკივარია – ხშირად ესწრება უიმბლდონის ტურნირს და სპორტის ამ სახეობის მიმართ განსაკუთრებულ ინტერესს იჩენს.
ასევე დაგაინტერესებთ:
#OK! ორი მირანდა ერთ ოთახში – მერილ სტრიპისა და ანა ვინტურის ვოგის ექსკლუზიური ინტერვიუ
#OK! ანა ვინტური ამერიკული Vogue – ის მთავარი რედაქტორის თანამდებობას ტოვებს
