ქართველი მსახიობი თორნიკე გოგრიჭიანი BBC-ის გახმაურებული სერიალის, „Vigil“-ის, მესამე სეზონში გამოჩნდა. მსახიობი რუსი პოლკოვნიკის, ფიოდორის, როლს ასრულებს.
სიუჟეტი ბრიტანეთის სპეციალური დანიშნულების ძალების წევრის მკვლელობას უკავშირდება. ახალ ეპიზოდებში სიუზან ჯონსი და „Game of Thrones“-ის ვარსკვლავი როუზ ლესლი კვლავ ემი სილვასა და კირსტენ ლონგაკრის როლებში გვევლინებიან.
სიუჟეტის მიხედვით, სამართალდამცავები შორეულ არქტიკულ კვლევით სადგურზე მოხვდებიან, სადაც საიდუმლო ბრიტანული სპეცრაზმის წევრი დახვრიტეს. მათი მიზანი მკვლელის დაჭერა, მოსალოდნელი საერთაშორისო დაპირისპირების თავიდან აცილება და ურთიერთობების გადარჩენაა.
„Vigil“-ის მესამე სეზონის პრემიერა 30 აგვისტოს შედგა.
თორნიკე გოგრიჭიანთან ერთად მსახიობთა შემადგენლობაში არიან ჯეპე ბეკ ლაუსენი (ჰენრიკ ბეკენი), ნაომი იანგი (შენ ჯია), სტივენ მილერი (მარკ კანინგემი), ბენჯამინ უეინრაიტი (ოლი პიკფორდი), დანუსია სამალი (ჯასმინ კელი), ერიკ გოდონი (მერი კოროტაევი) და ეიმი მენსონი (ლორნა მაკკალისტერი).
„Vigil“ ეკრანებზე პირველად 2021 წელს გამოვიდა. სერიალის პირველი სეზონი ბრიტანეთის საზღვაო ძალების წყალქვეშა ნავზე განვითარებულ მოვლენებს, მეორე სეზონი კი სამხედრო დრონების პროგრამასთან დაკავშირებულ გამოძიებას ეხებოდა. თითოეული სეზონი ექვსი ეპიზოდისგან შედგება.
პირველმა სეზონმა საუკეთესო დრამატული სერიალის კატეგორიაში ემის ჯილდო მიიღო, ასევე ნომინირებული იყო BAFTA-ზე. სერიალის მეორე სეზონი თითქმის ცხრა მილიონმა მაყურებელმა ნახა, რითიც BBC-ის წლის სამ ყველაზე პოპულარულ დრამას შორის მოხვდა.
თორნიკე გოგრიჭიანისთვის „Vigil“ კიდევ ერთი საერთაშორისო პროექტია. ქართველი მსახიობი მანამდე Netflix-ის „Extraction 2“-სა და Apple TV+-ის „Drops of God“-შიც გამოჩნდა.
ასევე დაგაინტერესებთ:
