ბრიტანული BBC-ის და ფრანგული ARTE-ის სერიალის „ღამის ცვლა“ (The Vigil) მესამე სეზონის გადაღება დაიწყო, რომელშიც ქართველი მსახიობი, თორნიკე გოგრიჭიანი მონაწილეობს. ეპიზოდი ქართველი მსახიობის მონაწილეობით მალე ეკრანებზე გამოვა.
ათწლეულის ერთ-ერთ ყველაზე წარმატებული ბრიტანული სერიალის გადაღებები შპიცბერგენსა და შოტლანდიაში მიმდინარეობს. მასში მთავარ როლებს სურან ჯონსი (უფროსი ინსპექტორი ემი სილვა) და როუზ ლესლი (ინსპექტორ კირსტენ ლონგაეიკრი)ასრულებენ.
სიუჟეტის მიხედვით, სამართალდამცავები შორეულ არქტიკულ კვლევით სადგურზე მოხვდებიან, სადაც საიდუმლო ბრიტანული სპეცრაზმის წევრი დახვრიტეს. მათი მიზანი მკვლელის დაჭერა, მოსალოდნელი საერთაშორისო დაპირისპირების თავიდან აცილება და ურთიერთობების გადარჩენაა.
„მადლობას ვუხდი BBC-სა და World Productions-ს ამ ამბიციური ისტორიის მხარდაჭერისთვის. ამ სეზონში ჩვენ ვეხებით საკითხებს, რომლებიც მსოფლიოს მომავალს განსაზღვრავენ: პოლარული ყინულების დნობა, რესურსებთან დაკავშირებული კონფლიქტები, ენერგეტიკული ომები და ა.შ.“ – განაცხადა სცენარისტმა და პროდიუსერმა ტომ ეჯიმ
„ღამის ცვლის“ პირველმა სეზონმა 2021 წელს საუკეთესო დრამატული სერიალის კატეგორიაში ემის ჯილდო მიიღო, ასევე ნომინირებული იყო BAFTA-ზე. სერიალის მეორე სეზონი თითქმის ცხრა მილიონმა მაყურებელმა ნახა, რითიც BBC-ის წლის სამ ყველაზე პოპულარულ დრამას შორის მოხვდა. ექვსნაწილიანი სერიალი World Productions-ის (Until I Kill You, Showtrial, Line of Duty) მიერ შეიქმნა. მისი პრემიერა 2021 წელს შედგა.
შეგახსენებთ, რომ თორნიკე გოგრიჭიანი მონაწილეობდა ისეთ საერთაშორისო პროექტებში, როგორიცაა Netflix-ის ფილმი „დახსნა 2“ (Extraction 2), სადაც მთავარი ბოროტმოქმედი ზურაბ რადიანი განასახიერა, პარტნიორობას კი ცნობილი მსახიობი, კრის ჰემსუორთი უწევდა.
2025 წლის იანვარში ბუდაპეშტში დაიწყო ჰოლივუდის ახალი ფილმის გადაღებები, რომელშიც თორნიკე გოგრიჭიანი მონაწილეობს. ფილმის რეჟისორი, რომელსაც კომპანია Apple Original Films, სტუდია Skydance და Mattel ერთობლივად ქმნის, სემ ჰარგრეივია, თორნიკეს პერსონაჟს კი ისტბრუქი ქვია. ფილმის პრემიერა სავარაუდოდ 2026 წლის შემოდგომაზე შედგება. Matchbox კიდევ ერთი ახალი ფილმი იქნება, რომელიც სათამაშოების ბრენდითაა ინსპირირებული.
