მსახიობი სელმა ბლერი ნიუ-იორკის ჯონ კენედის საერთაშორისო აეროპორტში დააკავეს. მას ავიაკომპანია Delta Air Lines-ის თვითმფრინავში ეკიპაჟის წევრებზე თავდასხმას ედავებიან. ინციდენტი 11 ოქტომბერს, ლოს-ანჯელესიდან ნიუ-იორკისკენ მიმავალ რეისზე მოხდა.
მედიის ინფორმაციით, ფრენის დროს ბლერი აგრესიულად იქცეოდა. მას ერთ-ერთი ბორტგამცილებლის ცემას და მეორის დაკბენასაც ედავებიან – ერთ-ერთი მათგანი საავადმყოფოში გადაიყვანეს.
თვითმფრინავის ნიუ-იორკში დაშვების შემდეგ სამართალდამცველებმა მსახიობი დააკავეს და სამედიცინო შემოწმებისთვის საავადმყოფოში გადაიყვანეს. შემთხვევის შესწავლაში გამოძიების ფედერალური ბიურო (FBI) ჩაერთო.
ბლერის წარმომადგენლის განცხადებით, მსახიობს ფრენის დროს ჯანმრთელობის გადაუდებელი პრობლემა შეექმნა, რამაც, მისი თქმით, ბრალდებაში აღწერილი ქმედებები გამოიწვია. თვითმფრინავის დაშვებისთანავე ბლერს სამედიცინო დახმარება აღმოუჩინეს და მისი მდგომარეობა ამჟამად სტაბილურია.
მოგვიანებით გავრცელებული ინფორმაციით, მსახიობს დამატებით ორი ბრალდებაც წაუყენეს. პროკურატურის ცნობით, საავადმყოფოში გადაყვანისას ბლერმა პოლიციის თანამშრომელს, ხოლო სამედიცინო დაწესებულებაში – ექთანს დაარტყა. სასამართლომ 20 000 დოლარის გირაოს სანაცვლოდ გაათავისუფლა. მომდევნო სასამართლო სხდომა 2027 წლის 19 იანვრისთვისაა ჩანიშნული.
აღსანიშნავია, რომ ბლერი მსგავსი შემთხვევის გამო ყურადღების ცენტრში 2016 წელსაც მოექცა. მაშინ, მექსიკიდან ლოს-ანჯელესისკენ მიმავალ თვითმფრინავში მომხდარი ინციდენტის შემდეგ, ის საკაცით გადაიყვანეს. მოგვიანებით მსახიობმა განმარტა, რომ ალკოჰოლისა და მედიკამენტების შერევის გამო გონება დაკარგა და მომხდარისთვის ბოდიში მოიხადა.
სელმა ბლერს გაფანტული სკლეროზის დიაგნოზი 2018 წლის აგვისტოში დაუსვეს. მსახიობმა ამის შესახებ საჯაროდ იმავე წლის ოქტომბერში განაცხადა. გაფანტული სკლეროზი ქრონიკული აუტოიმუნური დაავადებაა, რომელიც ცენტრალურ ნერვულ სისტემას აზიანებს და შესაძლოა მოძრაობის, კოორდინაციისა და სხვა ფუნქციების დარღვევა გამოიწვიოს.
ასევე დაგაინტერესებთ:
