სანდრა ბულოკი პირად ცხოვრებაზე საუბარს წლების განმავლობაში ერიდებოდა. თუმცა, ჯენიფერ ენისტონთან გულწრფელ ინტერვიუში მან 2010 წლის ერთ-ერთი ყველაზე ხმაურიანი სკანდალი გაიხსენა – პერიოდი, როდესაც ჯესი ჯეიმსთან მისი ქორწინება დასრულდა და მსახიობი ერთდროულად პირად კრიზისსა და დედობის ახალ რეალობას უმკლავდებოდა.
„ერთ-ერთი ყველაზე მნიშვნელოვანი ფილმი ჩემთვის Gravity იყო, რადგან ის ძალიან ჰგავდა იმ მდგომარეობას, რომელშიც მაშინ ვიმყოფებოდი. ეს ჩემი ცხოვრების ძალიან ბნელი პერიოდი იყო. ვზრდიდი და ვიცავდი პატარა შვილს, თან ვცდილობდი, მეგლოვა და ამ მდგომარეობიდან თავი დამეღწია“, – უთხრა ბულოკმა ენისტონს.
საუბარია 2010 წლის სკანდალზე, რომელმაც ბალოკისა და ჯესი ჯეიმსის ქორწინება დაასრულა. წყვილი 2005 წელს დაქორწინდა, თუმცა ხუთი წლის შემდეგ ჯეიმსის სავარაუდო ღალატის შესახებ რამდენიმე ქალმა საჯაროდ ისაუბრა. მოგვიანებით მან ღალატი აღიარა და პასუხისმგებლობაც საკუთარ თავზე აიღო. იმავე წლის ივნისში წყვილი ოფიციალურად განქორწინდა.
სკანდალი ბულოკის კარიერის ერთ-ერთ ყველაზე მნიშვნელოვან მომენტს დაემთხვა. მსახიობმა ცოტა ხნით ადრე The Blind Side-ში შესრულებული როლისთვის „ოსკარი“ მიიღო, თუმცა ჯილდოსა და პროფესიული წარმატების ფონზე მისი პირადი ცხოვრება მოულოდნელად მსოფლიო მედიის ყურადღების ცენტრში მოექცა.
ამასთან, საზოგადოებისთვის უცნობი იყო კიდევ ერთი მნიშვნელოვანი დეტალი – იმ პერიოდში ბალოკი ახალშობილი ვაჟის, ლუისის დედა იყო. მსახიობმა ბავშვი 2010 წლის იანვარში იშვილა, თუმცა ეს ინფრომაცია გარკვეული პერიოდის განმავლობაში საჯაროდ არ გაუმხელია.
„კარადას ვალაგებდი და ჰოკეის ჩანთები ვიპოვე, რომლებშიც მოგზაურობისას ტანსაცმელს ვაწყობდი. როცა ყველაფერი თავზე დამემხო და მივხვდი, რომ სახლიდან უნდა გავსულიყავი, რადგან პაპარაცები შემოვარდებოდნენ… არავინ იცოდა, რომ ახალშობილი მყავდა“, – გაიხსენა მსახიობმა.
შვილი ბავშვის სავარძელში ჩავსვი, შემდეგ სავარძელი ჰოკეის ჩანთაში მოვათავსე და მანქანამდე მივიტანე, თითქოს უბრალოდ ჩვეულებრივი ჰოკეის ჩანთა მიმქონდა“.
ბულოკის თქმით, შვილების პირადი ცხოვრების დაცვა დღემდე განსაკუთრებულად მნიშვნელოვანია და ამისთვის ზოგჯერ მართლაც უჩვეულო ზომების მიღება უწევს.
„CIA-ს მსგავსად უნდა იმოქმედო. თუ კარგი ხალხით ხარ გარშემორტყმული, ყველაფერი კარგად იქნება. მაგრამ თუ შენს გვერდით არიან ადამიანები, რომლებსაც შენთვის ზიანის მიყენება სურთ, მაშინ, რაც არ უნდა ფრთხილი იყო, რამდენიც არ უნდა დაგეგმო წინასწარ და რამდენად ფარულადაც არ უნდა იმოქმედო, შენი პირადი ცხოვრება მათთვის ყოველთვის ფულის წყარო იქნება. ამან არაერთხელ გამიტეხა გული. ვიცი, რა საშინელი გრძნობაცაა“.
ჯესი ჯეიმსთან განქორწინების შემდეგ სანდრა ბულოკის ცხოვრებაში ფოტოგრაფი ბრაიან რენდალი გამოჩნდა. ისინი 2015 წლიდან ხვდებოდნენ ერთმანეთს. რენდალი 2023 წელს, 57 წლის ასაკში გარდაიცვალა.
ასევე დაგაინტერესებთ:
#OK! სანდრა ბულოკის მეგობარი მამაკაცი ბრაიან რანდალი 57 წლის ასაკში გარდაიცვალა
