ვენეციის 83-ე კინოფესტივალის წითელ ხალიჩაზე წელს არაერთი ცნობილი მსახიობი გამოჩნდა, თუმცა კამერების ყურადღება განსაკუთრებით 18 წლის ევერ ანდერსონმა მიიქცია. ახალგაზრდა მსახიობი მილა იოვოვიჩისა და რეჟისორ პოლ უ. ს. ანდერსონის ქალიშვილია. მისი გამოჩენის შემდეგ არაერთმა გამოცემამ სწორედ დედასთან საოცარი მსგავსება აღნიშნა.
ამჯერად ევერ ანდერსონი ვენეციის ფესტივალზე ახალი ფილმის, Father Joe-ს, პრემიერისთვის ჩავიდა. ბართლემი გროსმანის რეჟისორობით გადაღებულ ნამუშევარში იგი ფელისიტის როლს ასრულებს, მთავარ როლებში კი კიფერ საზერლენდი და ალ პაჩინო არიან. ფილმის ჩვენება ვენეციის ფესტივალზე 5 სექტემბერს გაიმართა.
Vogue-სთან საუბრისას მსახიობმა აღნიშნა, რომ ფელისიტის პერსონაჟთან გარკვეული ემოციური კავშირი მალევე იგრძნო. მისთვის მნიშვნელოვანი გამოცდილება აღმოჩნდა ალ პაჩინოსა და კიფერ საზერლენდთან მუშაობაც.
ფილმის პრემიერისთვის ევერმა Dior-ის 2027 წლის Resort კოლექციის გამჭვირვალე, თხელი სილუეტის კაბა აირჩია, რომელიც ყვავილოვანი დეტალებითა და ნაქარგებით იყო გაფორმებული. მანამდე, ფოტოსესიაზე, 1930-იანი წლების ვინტაჟურ, გამჭვირვალე თეთრ კაბაში გამოჩნდა, რომელსაც მწვანე ფეხსაცმელი და Dior-ის სამკაულები შეუხამა.
ვინ არის ევერ ანდერსონი?
ევერ გაბო ანდერსონი 2007 წლის 3 ნოემბერს ლოს-ანჯელესში დაიბადა. მისი დედა ცნობილი მსახიობი და ყოფილი მოდელი მილა იოვოვიჩია, მამა კი – რეჟისორი პოლ უ. ს. ანდერსონი.
ევერისთვის კამერები და გადასაღები მოედანი ბავშვობიდან ნაცნობი გარემოა. ჯერ კიდევ 9 წლის ასაკში Vogue Bambini-ის გარეკანზე გამოჩნდა.
მოდელობიდან მსახიობობამდე მისი კარიერული გზა საკმაოდ ბუნებრივად განვითარდა: სხვადასხვა მოდის სახლის კამპანიებში მონაწილეობდა და Miu Miu-სთანაც თანამშრომლობდა. 2026 წელს კი მის კარიერაში კიდევ ერთი მნიშვნელოვანი ეტაპი დადგა – ის Dior-ის ოფიციალური ამბასადორი გახდა.
მისი პირველი დიდი როლი 2016 წელს, ფილმში Resident Evil: The Final Chapter, შედგა, სადაც ახალგაზრდა ალისია მარკუსი განასახიერა. პერსონაჟის ზრდასრულ ვერსიას კი თავად მილა იოვოვიჩი თამაშობდა.
შემდეგ იყო Black Widow, 2023 წელს კი Disney-ის Peter Pan & Wendy-ში ვენდი დარლინგის როლი მოირგო.
ასევე დაგაინტერესებთ:
#OK! მილა იოვოვიჩის 18 წლის ქალიშვილი Dior-ის ახალი სახე გახდა
#OK! ალ პაჩინო და მილა იოვოვიჩის შვილი ერთ ფილმში – პარიზში „მამა ჯოს“ გადაღებები მიმდინარეობს
