მოგესალმებით, თავის მოვლის გურუებო!
ჩემი დღევანდელი ბლოგი მინდა მივუძღვნა სილამაზისა და თავის მოვლის ინდუსტრიის გავლენას ადამიანებზე. ალბათ დაფიქრებულხართ, რამდენად დიდია მარკეტინგის წნეხი, სილამაზის სტანდარტების ჩვენზე გავრცელების ძალა და ამ ყველაფერში, ცხადია, უდიდეს როლს ინტერნეტი და სოცქსელები თამაშობს – ინფორმაციის ჩვენამდე უსწრაფესად მოღწევის მთავარი საშუალება.
კაცობრიობის ისტორია გვიყვება, რომ სილამაზის სტანდარტების დამკვიდრება ჩვენს წელთაღრიცხვამდე 3000 წლით ადრე, უძველესი ეგვიპტური კულტურიდან იღებს სათავეს. არქეოლოგიური გათხრები და აღმოჩენები მოწმობს, რომ ეგვიპტელები საკმარისად კარგად იცნობდნენ და იყენებდნენ კოსმეტიკას, თავისებურად უვლიდნენ კანს, იცვლიდნენ ნაკვთებს, იღებავდნენ ტუჩებს (თქვენ წარმოიდგინეთ, რომ 3000 წლის წინაც ძალიან მოდური იყო დიდი ტუჩები). შამანებისა და ქურუმების მიერ დამზადებული ფერ-უმარილი ფართოდ მოიხმარებოდა. გამოიყენებოდა ზეთისხილის ზეთი, თაფლი, სხვადასხვა სურნელოვანი ზეთები, მცენარეების წვენები. თმის საღებავის უძველესი რეცეპტი ჩვენს წელთაღრიცხვამდე 1580 წელს, მე-18 დინასტიის ეგვიპტელი ფარაონის ძვირფას მეუღლეს ეკუთვნის. კლეოპატრას მიერ რძის აბაზანების სიყვარულზე ხომ მთელმა მსოფლიომ ვიცით. კლეოპატრამ კარგად მიაგნო რძემჟავას – ალფა ჰიდროქსიდ მჟავას სახის კანზე მოქმედების იდეალურ ფუნქციას და შესანიშნავად იყენებდა კანის სტრუქტურის ერთგვაროვნებისა და სილამაზისთვის.
მოდი, გადმოვინაცვლოთ აღორძინების ეპოქაში, როცა კოსმეტიკა და თავის მოვლის კულტურა ახლიდან აღორძინდა. ეგვიპტისა და აღმოსავლეთის ქვეყნებიდან კოსმეტიკის ხელოვნება შეიჭრა საფრანგეთში, შემდეგ სხვა ევროპულ ქვეყნებსა და რუსეთში. თავიდან ის დეკორატიული კოსმეტიკის სახით იყო გავრცელებული, რათა კანის ნაკლოვანებები დაეფარა, მაგალითად, ნაყვავილარი სახის დეფექტები.
მეცხრამეტე საუკუნიდან კოსმეტიკამ და გარეგნობაზე ზრუნვამ მყარად დაიკავა ადგილი ადამიანების ჰიგიენურ რიტუალებში და დაიწყო განვითარება, როგორც სიღრმისეულად გამოკვლევადმა და მნიშვნელოვანმა დარგმა. მე-19 საუკუნის ბოლოს რუსეთში საფუძველი ეყრება საპარფიუმერიო წარმოებას და იხსნება კოსმეტოლოგიური კაბინეტები.
რა ხდება დღეს, განვითარებულ, მაღალტექნოლოგიურ 21-ე საუკუნეში?
ინტერნეტისა და სოციალური ქსელების არსებობამ, სხვა გლობალურ ტენდენციებთან ერთად, სილამაზის სტანდარტები კიდევ უფრო მოცულობითი და გავლენიანი გახადა. თავადაც ვერ მივხვდით, ისე აღმოვჩნდით ხაფანგში, რომლისგან თავის დაღწევაც, პირდაპირ ვთქვათ, ფაქტობრივად, არც გვინდა. სილამაზის ინდუსტრიის ჰიპერგანვითარებამ ნელ-ნელა წაშალა ზღვარი ყოველდღიური ჰიგიენის რიტუალების საჭიროებასა და ესთეტიკური, ვიზუალური სახეცვლილების დაუოკებელ სურვილს შორის. ესთეტიკური მედიცინის მეოცე საუკუნის რევოლუციურმა განვითარებამ, ახალი ტენდენციების დანერგვამ, ახალმა მოდამ, რომელსაც მსოფლიო სელებრითები და ინფლუენსერები უშურველად გვიზიარებენ, ამოატრიალა თანამედროვე ადამიანის ესთეტიკური გემოვნება, უკან ჩააჩოჩა ინდივიდუალიზმი და ახალი მოდური ვიზუალის მზა ფორმულები შემოგვთავაზა. მოდურია კიმ კარდაშიანის ტუჩები და გავა, ბელა ჰადიდის ლოყები ბიშექტომიის შემდეგ, ანჯელინა ჯოლის ნიკაპი, ჩვენთან – ლელა კილაძისა და შორენა ბეგაშვილის ნაკვეთები და სახის კონტური, რომელიც წლების განმავლობაში არ კარგავს პოპულარობას. სამწუხაროდ, თითქმის არ ისმება კითხვა: რა იქნება მერე, რა ცვლილებები მოჰყვება ვიზუალში ასე აქტიურად ჩარევას წლების შემდგომ? როგორები ვიქნებით 20-30 წლის შემდეგ? ან რატომ უნდა ვგავდეთ ყველანი ერთმანეთს, რა არის ამაში კარგი, მომხიბლავი?
პირადად ჩემი აზრით, ის, რაც მასობრივი არხებით სილამაზის სტანდარტების გავრცელების ყველაზე დიდი საფრთხეა, ეს არის მათი წვდომა მოზარდებზე. როგორ იღებენ მოზარდები და ბავშვები მათზე თავს მოხვეულ ამდენ კლიშეს და საზოგადოებრივ დაკვეთებს? რამდენად უძლებს მათი მყიფე ფსიქიკა, ჯერ კიდევ ჩამოუყალიბებელი იდენტობა ტიკტოკის, ინსტაგრამის ბრჭყვიალა ვიდეოებიდან მიღებულ უამრავ არასაჭირო და მათი ასაკისთვის მავნებლურ ინფორმაციას?
ჩემს ბლოგს დავასრულებ იმედით, რომ ნელ-ნელა ცივილიზებული საზოგადოება კვლავ აღიარებს ადამიანის თვითნაბადი ინდივიდუალიზმის ერთადერთობასა და შეუცვლელობას. იმედს ვიტოვებ, რომ ჩვენთან ასე ჰიტად ქცეული სილამაზის ამერიკული და რუსული ტენდენციები აუცილებლად ჩანაცვლდება ევროპული, დაბალანსებული, ადამიანის ბუნებრივ სილამაზესა და ვიზუალზე მორგებული მოვლის კულტურით.
ყველას საკუთარ თავთან, გარეგნობასა და განწყობასთან ჰარმონიაში ცხოვრებას და სულიერ სიმშვიდეს გისურვებთ.
თქვენი თაკო გვაზავა
ჟურნალი OK!-ს ბიუთი რედაქტორი
