Dior-ის კრეატიული დირექტორი, ჯონათან ანდერსონი, ბრენდის ამბასადორთა რიგებს აფართოებს. ამჯერად მან სარეკლამო კამპანია წარმოადგინა, რომლის მთავარი გმირები მილა იოვოვიჩის ქალიშვილი, ევერ ანდერსონი და მსახიობი სოფი უაილდი გახდნენ.
მია გოთთან ერთად მათ საიუველირო ნაკეთობების კოლექცია Rose des Vents წარადგინეს. ევერისთვის ეს დიდ ბრენდთან თანამშრომლობის პირველი გამოცდილება არ არის – მანამდე ის Chloé-სა და Miu Miu-ს კამპანიებშიც მონაწილეობდა.
ევერი მოდის კვირეულების ხშირი სტუმარია. ის Dior-ში, ჯონათან ანდერსონის სადებიუტო ჩვენებაზე, ასევე Chloé-სა და Miu Miu-ს სხვადასხვა სეზონის ჩვენებებზე შენიშნეს. ვარაუდობენ, რომ მალე მას ამ ბრენდების პოდიუმზეც ვიხილავთ.
სამოდელო კარიერის გარდა, ცნობილი მსახიობის ქალიშვილმა ძალები კინოშიც მოსინჯა. მისი დებიუტი 2016 წელს შედგა, როდესაც 9 წლის ევერმა ფილმში „ბოროტების სავანე: დასკვნითი ნაწილი“ დედის, მილა იოვოვიჩის პერსონაჟის ბავშვობა განასახიერა. გოგონამ „შავ ქვრივშიც“, მსგავსი როლი შეასრულა, თუმცა ამ შემთხვევაში, სკარლეტ იოჰანსონის გმირის ბავშვობა განასახიერა. ამჟამად მისი ნახვა სერიალში „The Artist“ და ფილმში „პიტერ პენი და ვენდი“ არის შესაძლებელი.
რაც შეეხება კოლექციას, ის მოდის სახლის ერთ-ერთ საკულტო სიმბოლოს — „ქარის ვარდს“ (Rose des Vents) ეძღვნება, რომელიც Dior-ის საიუვილერო მიმართულების დირექტორმა, ვიქტუარ დე კასტელანმა, 2015 წელს შექმნა. ხაზის შექმნისას მისი შთაგონების წყარო დიდი მაესტროს ბავშვობა იყო. როგორც ბრენდის ვებ-გვერდზე წერია, კასტელანი გრანვილში მდებარე ვილა Les Rhumbs-ს ეწვია, სადაც კრისტიან დიორი გაიზარდა და ბაღში სწორედ ეს სიმბოლო შენიშნა.
ასევე დაგაინტერესებს
#OK! ალ პაჩინო და მილა იოვოვიჩის შვილი ერთ ფილმში – პარიზში „მამა ჯოს“ გადაღებები მიმდინარეობს
