ქართველ რეჟისორს, სცენარისტსა და პროდიუსერს, ლევან კოღუაშვილს, კინოსა და ტელევიზიის განვითარებაში შეტანილი წვლილისთვის „ოქროს გლობუსის“ სპეციალური ჯილდო – Trailblazer Award გადაეცა. დაჯილდოების ცერემონია 23–24 ოქტომბერს უზბეკეთის დედაქალაქ ტაშკენტში, Golden Globes Silk Road Tribute Gala-ს ფარგლებში გაიმართა.
ღონისძიება ცენტრალური აზიისა და კავკასიის ქვეყნების კინოსა და ტელევიზიის სფეროს წარმომადგენელთა მიღწევების აღსანიშნავად ჩატარდა. ჯილდოები სამ კატეგორიაში – Meridian Award, Trailblazer Award და Beacon Award – გაიცა.
„ოქროს გლობუსის“ პრეზიდენტის, ჰელენ ჰონეს განცხადებით, დაჯილდოების მიზანი იმ ხელოვანთა აღიარებაა, რომელთა შემოქმედებაც ცენტრალური აზიისა და კავკასიის კულტურას და უნიკალურ ისტორიებს საერთაშორისო აუდიტორიას აცნობს.
გალა-საღამოს სტუმრებს შორის ჰოლივუდის მსახიობი, „ოსკარის“ ორგზის მფლობელი ადრიენ ბროუდიც იყო. მსახიობი ღონისძიების წითელ ხალიჩაზე გამოჩნდა.
დაჯილდოებისას ლევან კოღუაშვილმა საქართველოზე ისაუბრა და ქართული კინოს ისტორიასა და მის მნიშვნელობას გაუსვა ხაზი.
„მე წარმოვადგენ ქვეყანას, სადაც პირველი სრულმეტრაჟიანი ფილმი ჯერ კიდევ 1912 წელს გადაიღეს. მას შემდეგ, მთელი ისტორიის განმავლობაში, ჩვენი კინემატოგრაფისტები ყოველთვის ახერხებდნენ შეუძლებლის გაკეთებას. მკაცრი საბჭოთა ცენზურის პირობებშიც კი ისინი ქმნიდნენ ლამაზ, თავისუფალ ფილმებს, მიუხედავად იმისა, რომ ეს მარტივი არ იყო” – განაცხადა რეჟისორმა ჯილდოს მიღებისას.
ლევან კოღუაშვილმა მსოფლიო აღიარება ისეთი ფილმებით მოიპოვა, როგორებიცაა „ქუჩის დღეები“, „ბრმა პაემნები“ და „მეოთხე ბრაიტონი“. ამ უკანასკნელმა ტრაიბეკას კინოფესტივალზე საუკეთესო საერთაშორისო მხატვრული ფილმის ჯილდო მიიღო.
რეჟისორის უახლესი ნამუშევრის, „გურიას“, პრემიერა 2026 წლის ვენეციის საერთაშორისო კინოფესტივალზე შედგა. ფილმი „ოსკარის“ ნომინაციაზე საქართველოს ოფიციალური კანდიდატია.
ასევე დაგაინტერესებთ:
#OK! საქართველოს სახელით „ოსკარზე“ ლევან კოღუაშვილის ფილმი „გურია“ წარდგება
