საქართველოს კინემატოგრაფიის ეროვნული ცენტრი ამერიკის კინოაკადემიის ჯილდოზე, „ოსკარზე“, საქართველოს სახელით რეჟისორ ლევან კოღუაშვილის ფილმს „გურია“ წარადგენს. ნამუშევარი 2027 წლის, რიგით 99-ე დაჯილდოებაზე საერთაშორისო სრულმეტრაჟიანი ფილმის ნომინაციაში იქნება წარდგენილი – ინფორმაციას კულტურის სამინისტრო ავრცელებს.
ფილმი ქართული და საერთაშორისო პარტნიორების ერთობლივი კოპროდუქციაა.
„გურია“ საქართველოს კანდიდატად სპეციალურმა კომისიამ შეარჩია. კონკურსში სულ ხუთი ფილმი მონაწილეობდა, გამარჯვებული კი ფარული კენჭისყრით გამოვლინდა. „გურიასთან“ ერთად კანდიდატობისთვის იბრძოდნენ გიორგი ოვაშვილის „მთვარე მამაა ჩემი“, ნინო ბასილიას „ფაზა“, ნიკოლოზ ხომასურიძის „გააზიარე სიყვარული“ და ანა ურუშაძის „მეორეხარისხოვანი როლი“.
ფილმში მოქმედება 1990-იანი წლების დასაწყისის გურიაში ვითარდება – ქვეყანაში, სადაც სიღარიბე, უშუქობა, კრიმინალი და რთული სოციალური მდგომარეობა ყოველდღიურობის ნაწილია. თუმცა ფილმი ამ პერიოდს მხოლოდ დრამატული კუთხით არ უყურებს. მძიმე რეალობას თან ახლავს იუმორი, სიმღერა, სიყვარული, ჩხუბი, ოცნებები და ადამიანური ურთიერთობები.
მთავარ როლებს კახაბერ ჭოლაძე და ვამეხ ჯანგიძე ასრულებენ.
„გურიას“ საფუძვლად გიორგი კეკელიძის „გურული დღიურები“ დაედო. თუმცა ფილმი წიგნის პირდაპირი ეკრანიზაცია არ არის. კოღუაშვილმა ნაწარმოებით შთაგონების შემდეგ თავად დაიწყო გურიაში მოგზაურობა, ადგილობრივებთან შეხვედრა და მათი ისტორიების გაცნობა. რეჟისორს განსაკუთრებით 1990-იანი წლების გურიის ყოფა და იქ მცხოვრები ადამიანების ისტორიები აინტერესებდა.
სწორედ ამ მოგონებებისა და რეალური ამბების საფუძველზე ჩამოყალიბდა ფილმის სიუჟეტი. საბოლოო სცენარზე ლევან კოღუაშვილთან ერთად გიორგი კეკელიძემ და ბორის ფრუმინმა იმუშავეს.
აღსანიშნავია, რომ ოსკარამდე „გურია“ ვენეციის კინოფესტივალის ოფიციალური სექციის Venezia Spotlight მონაწილეა. ფილმის მსოფლიო პრემიერა 9 სექტემბერს გაიმართება.
ასევე დაგაინტერესებთ:
#OK! ქართველი სოპრანო ანა ონიანი ვერბიეს ფესტივალის აკადემიის უმაღლესი ჯილდოს მფლობელი გახდა
