ქართველი სოპრანო, ანა ონიანი შვეიცარიაში გამართული ვერბიეს ფესტივალის აკადემიის უმაღლესი ჯილდოს, Prix Yves Paternot-ის, მფლობელი გახდა. პრესტიჟული ჯილდო ყოველწლიურად იმ ახალგაზრდა მუსიკოსს გადაეცემა, რომელიც აკადემიაში განსაკუთრებული მხატვრული მიღწევებითა და დიდი სამომავლო პოტენციალით გამოირჩევა.
ჯილდო ანა ონიანს ჯუზეპე ვერდის ოპერა „ტრავიატაში“ ვიოლეტას როლის შესრულებისთვის გადაეცა. სპექტაკლი ვერბიეს ფესტივალის აკადემიის საოპერო სახელოსნომ, Atelier Lyrique-მ, წარადგინა.
ვერბიეს ფესტივალის აკადემიის დირექტორმა, სტივენ მაკჰოლმმა, ანა ონიანის შესრულება განსაკუთრებულად შეაფასა და სწორედ მის სცენურ ბუნებრიობასა და ვოკალურ შესაძლებლობებზე გაამახვილა ყურადღება.
„ანას სცენაზე საოცარი ბუნებრიობა ახასიათებს. ისეთი სიმარტივითა და გულწრფელობით მღერის, რომ მსმენელს მაშინვე იზიდავს მის სამყაროში. ვიოლეტას როლში მისმა შესრულებამ მაყურებელი მთლიანად მოხიბლა და დაადასტურა ის, რასაც აკადემიის ფაკულტეტის წევრები მისგან თავიდანვე ელოდნენ – გამორჩეული ახალგაზრდა არტისტი ძალიან ნათელი მომავლით“, – განაცხადა მაკჰოლმმა.
თავად ანა ონიანისთვის ვერბიეს აკადემიაში მონაწილეობა კარიერის ერთ-ერთი მნიშვნელოვანი ეტაპი აღმოჩნდა.
„აკადემია ჩემი ცხოვრების ერთ-ერთი ყველაზე შთამაგონებელი გამოცდილება იყო. ასეთ არაჩვეულებრივ პედაგოგებსა და კოლეგებთან მუშაობა და ვერბიეში ამ როლის შესრულება ჩემი ოცნება გახლდათ. Prix Yves Paternot-ის მიღება წარმოუდგენელი პატივი და დიდი სტიმულია” – განაცხადა მან.
Prix Yves Paternot ვერბიეს ფესტივალის აკადემიის ყველაზე მნიშვნელოვანი ინდივიდუალური ჯილდოა. ის ყოველწლიურად გადაეცემა აკადემიის ყველაზე წარმატებულ და პერსპექტიულ ახალგაზრდა მუსიკოსს და მხოლოდ კონკრეტული შესრულების შეფასებას არ გულისხმობს – ჯილდო იმ არტისტის პოტენციალსა და მომავალ კარიერულ განვითარებასაც აღიარებს.
აღსანიშნავია, რომ ჯილდოს 10 000 შვეიცარიული ფრანკის ოდენობის ფულადი პრემია ახლავს. გარდა ამისა, გამარჯვებული ვერბიეს ფესტივალის ერთ-ერთ მომავალ ღონისძიებაზე გამოსვლის მიწვევას იღებს და პროფესიული თუ არტისტული განვითარების ხელშეწყობისთვის დამატებით 15 000 შვეიცარიულ ფრანკამდე დაფინანსებით სარგებლობს.
ანა ონიანი
ანა ონიანი თბილისში დაიბადა. მისი მუსიკალური გზა თავდაპირველად დირიჟორობას უკავშირდებოდა, თუმცა მოგვიანებით ვოკალურ ხელოვნებაზე გააკეთა არჩევანი და სწავლა თბილისის ვანო სარაჯიშვილის სახელობის სახელმწიფო კონსერვატორიაში განაგრძო.
ჯერ კიდევ სტუდენტობის პერიოდში ონიანმა არაერთი მნიშვნელოვანი საოპერო პარტია შეასრულა. მის რეპერტუარშია მიმის როლი პუჩინის „ბოჰემაში“, პამინას პარტია მოცარტის „ჯადოსნურ ფლეიტაში“, გრაფინია „ფიგაროს ქორწინებიდან“ და ვიოლეტა ვერდის „ტრავიატადან“. სწორედ ამ უკანასკნელმა მოუტანა მას საერთაშორისო ყურადღება.
