ქეითლინ ჯენერი, კენდალ და კაილი ჯენერების მამა და რეალითი შოუს Keeping Up with the Kardashians-ის ვარსკვლავი, მედიის ყურადღების ცენტრში მოექცა. სოციალურ ქსელებში გავრცელდა ინფორმაცია, თითქოს იგი გენდერული ტრანზიციის გადაწყვეტილებას ნანობს და კაცად დაბრუნებას გეგმავს.
ინფორმაცია 2026 წლის 25 ოქტომბერს სოციალურ ქსელ X-ზე გავრცელდა. პოსტის ავტორი ამტკიცებდა, რომ ჯენერს 11 წლის შემდეგ კვლავ „მამაკაცად ყოფნა სურს“. თუმცა, თავად ჯენერს საჯაროდ არ დაუდასტურებია, რომ გენდერულ ტრანზიციას ნანობს.
მსგავსი ცნობები ჯერ კიდევ 2016 წლის მაისში გავრცელდა. მაშინ მწერალმა იან ჰალპერინმა, რომელიც კარდაშიანების ოჯახის შესახებ წიგნზე მუშაობდა, გამოცემა TheWrap-თან ინტერვიუში განაცხადა, ქეითლინი ტრანზიციის შემდეგ საკუთარ გადაწყვეტილებას ნანობდა.
მოგვიანებით ეს ინფორმაცია სხვა მედიასაშუალებებმაც გაავრცელეს, თუმცა რეალითი შოუს ვარსკვლავის წარმომადგენელმა ცნობები უარყო და განაცხადა, რომ ისინი სიმართლეს არ შეესაბამებოდა.
ქეითლინ ჯენერის ტრანზიციის ისტორია
ქეითლინ ჯენერმა (ბრიუს ჯენერი) საერთაშორისო აღიარება სპორტული მიღწევებით მოიპოვა. 1976 წელს, მონრეალის ზაფხულის ოლიმპიურ თამაშებზე, ათჭიდში ოქროს მედალოსანი გახდა და მსოფლიო რეკორდი დაამყარა. ამ გამარჯვებამ ის ამერიკის ერთ-ერთ ყველაზე ცნობილ სპორტსმენად აქცია.
სპორტული კარიერის დასრულების შემდეგ ჯენერი ტელევიზიაში გამოჩნდა და კარდაშიანების ოჯახის რეალითი შოუს, Keeping Up with the Kardashians-ის, წევრი გახდა. იგი წლების განმვალობაში კრის ჯენერზე იყო დაქორწინებული და კენდალ და კაილი ჯენერების მამაა.
2015 წლის აპრილში ჯენერმა ჟურნალისტ დაიან სოიერთან ინტერვიუში საჯაროდ განაცხადა, რომ ტრანსგენდერი ქალია. იმავე წლის ივნისში ჟურნალ Vanity Fair-ის გარეკანზე ქეითლინ ჯენერის სახელით გამოჩნდა. ამავე პერიოდიდან ღიად დაიწყო საუბარი გენდერულ იდენტობასა და ტრანზიციის გამოცდილებაზე.
„ადამიანები სხვანაირად მიყურებენ… ისინი ჩემში მაჩო კაცს ხედავენ, მაგრამ ჩემი გული, სული და ყველაფერი, რასაც ცხოვრებაში ვაკეთებ, ქალურია. მე სწორედ ეს ვარ“ – ამბობდა მაშინ ჯენერი.
მის გადაწყვეტილებას საზოგადოების მწვავე რეაქციაც მოჰყვა. 10 000-ზე მეტმა ადამიანმა ხელი მოაწერა პეტიციას, რომლითაც საერთაშორისო ოლიმპიური კომიტეტისგან მისთვის ოლიმპიური ჩემპიონობის ჩამორთმევას მოითხოვდნენ.
საერთაშორისო ოლიმპიური კომიტეტის გადაწყვეტილებით, ოლიმპიურ ასპარეზობაში კაცის სტატუსით გამოსული ჯენერის სპორტული მიღწევები გადახედვასა და შეცვლას არ ექვემდებარებოდა. შესაბამისად, მისი ოქროს მედალი ძალაში დარჩა.
ასევე დაგაინტერესებთ:
#OK! როგორ მოიპოვა კრის ჯენერმა “ყველაზე მაგარი დედისა და მენეჯერის” სტატუსი
