ვენეციის 83-ე საერთაშორისო კინოფესტივალზე ქართველი პროდიუსერების მონაწილეობით შექმნილი ფილმი დაჯილდოვდა. შადენ საფიედინ ტაზის „A Few Moments of Happiness“ Orizzonti-ის სექციის საუკეთესო მოკლემეტრაჟიან ფილმად დასახელდა.
ნამუშევრის პროდიუსერები ანა ხაზარაძე და ნინო ჩიჩუა არიან, პროექტი კი მათ მიერ დაფუძნებული 1991 Productions-ის ლონდონის ფილიალის პირველი უცხოენოვანი მოკლემეტრაჟიანი ფილმია.
„A Few Moments of Happiness“ ახალგაზრდა ლიბანელი რეჟისორის ისტორიას გვიყვება, რომელიც პარიზში ცხოვრობს და ლიბანში მიმდინარე ომს ტელეფონის საშუალებით ადევნებს თვალს. სახლიდან, საკუთარი საწოლიდან, ის ყოველდღიურად აკვირდება სამშობლოში განვითარებულ მოვლენებს და ეკრანზე აღბეჭდილ ფრაგმენტებს აგროვებს.
ფილმი ომის მასშტაბურ სურათს პირდაპირ არ გვიჩვენებს. მისი მთავარი ფოკუსი სწორედ დისტანციაა – როგორ განიცდის ადამიანი საკუთარი ქვეყნის ტრაგედიას მაშინ, როდესაც იქ ფიზიკურად არ იმყოფება.
ტაზი გვიჩვენებს თაობას, რომელიც ომის მოწმე არა უშუალოდ ბრძოლის ველიდან, არამედ ტელეფონის ეკრანიდან ხდება – ხედავს სამშობლოს განადგურებას, თუმცა მის შეჩერებას ვერ ახერხებს. სწორედ ეს უძლურება და ემიგრაციაში ყოფნის განცდა ქმნის ფილმის მთავარ ემოციურ ხაზს.
პროექტის წარმატება განსაკუთრებით მნიშვნელოვანია ქართველი პროდიუსერებისთვის – ანა ხაზარაძისა და ნინო ჩიჩუასთვის, რომლებიც 1991 Productions-ის თანადამფუძნებლები არიან.
კომპანიის საქმიანობის მთავარი მიმართულება მხატვრული და დოკუმენტური ფილმების განვითარება და საერთაშორისო კოპროდუქციებია.
ანა ხაზარაძე London College of Communication-ის კინოსა და ტელევიზიის მიმართულების კურსდამთავრებულია, ნინო ჩიჩუამ კი კინო-ტელევიზიის წარმოება ნიუ-იორკის უნივერსიტეტის Tisch School of the Arts-ში შეისწავლა.
მათ სხვა საერთაშორისო პროექტებს შორისაა ლევან აკინის „Crossing“, რომელიც 2024 წელს ბერლინის კინოფესტივალის Panorama-ს გახსნის ფილმი გახდა.
ვენეციის 83-ე კინოფესტივალი 12 სექტემბერს დასრულდა. მთავარი ჯილდოს, ოქროს ლომის მფლობელი რეჟისორ მაი ელ-ტუხის ფილმი „Woman Unknown“ გახდა.
ფესტივალის ჟიურის გრან-პრი სამხრეთკორეელი რეჟისორის, ლი ჩანგ-დონგის, ფილმმა „Possible Love“ მიიღო, საუკეთესო რეჟისორად კი ილია ხრჟანოვსკი დასახელდა.
ასევე დაგაინტერესებთ:
